नेपालभाषाया म्युजिक भिडियो ख्यलय् दकले न्हापांखुसिइ कुताक्षर छ्यला भिडियो दयेका पितब्वज्या याःगु दु ।
नेपाल भाषा एकेडेमीमा चान्सलर यज्ञरत्न धाख्वाः मूपाहाँ कथं झायादीगु छगू ज्याझ्वलय् पितब्वज्या जूगु ” मांअबु पिन्सं ” बोलया म्युजिक भिडियोया पाेष्टरय् थथे कुताक्षर छ्यलातःगु खः । कुताक्षर छ्यलेगु ज्यायात मूपाहाँ धाख्वाःजुं प्रशंसा यानादिसे संगीतख्यलय् मचा प्रतिभायात नं हःपाः बिइगु निंतिं दान्यहिरा सिरपाय् मचा प्रतिभाया निंतिं सिरपा फ्यानागु खँ न्ह्यथनादिल ।
प्रेम महर्जनं च्वयादीगु थ्व म्ये अतिकं लोकंह्वाम्ह गायिका निशा देशारं हालादीगु खः । विनय महर्जनं लसय् हनादीगु थ्व म्येया निंतिं किरण महर्जनं कुताक्षर दयेकादीगु खः ।
लुजः सिंहया सम्पादन व छायाँकन दूगु थ्व भिडियोय् अन्जलि महर्जन,अमिर स्थापित व प्रेक्षा अधिकारीया नापनापं बाल कलाकार आरादिता श्रीया अभिनय दुथ्याना च्वंगु दु ।
विहिबार यलया क्रोधकला शिरोमणि फाउण्डेशनय् जूगु पितब्वज्याय् प्रदेश सांसद रामकृष्ण चित्रकार, ज्यापु समाजया न्वकु सन्तमान महर्जन, लोकसाहित्य परिषदया नायः राजित बहादुर श्रेष्ठ, क्रोधकला शिरोमणि फाउण्डेशनया कजि राकेश अवाले , नेपालभाषाया न्हांपाम्ह म्युजिक भिडियो निर्देशक विजयरत्न असंबरे व म्येहालामि निशा देशार व नेवाः आइदल सिजन २ या हसना महर्जनपिन्सं नुगःखँ तयादीगु खः ।