स्तरोन्नति यायेगु ज्या न्ह्यानाच्वंगु अरनिको राजमार्ग अन्तर्गतया साँगा–धुलिखेल सडकखण्डय् कालोपत्र (पीच) यायेगु ज्या न्ह्याःगु दु । सूर्यविनायक–धुलिखेल, धुलिखेल–सिन्धुली–बर्दिबास सतक आयोजनां धुलिखेलनिसें बनेपा तकया स्वंगू किलोमिटर सतक कालोपत्र वइगु असार दुने क्वचायेकेगु तातुनागु धाःगु दु ।
अरनिको राजमार्ग जःखःया सांगा–धुलिखेल सतकखण्डयात ६ लेनय् विस्तार यायेत्यंगु दु । सूर्यविनायक–सांगा व सांगा–धुलिखेल निगू खण्डय् सतक विस्तार यायेगु ज्या जुयाच्वंगु दुसा सांगा–धुलिखेल खण्डय् कालोपत्र यायेगु ज्या न्ह्याःगु दु । आयोजनाया इन्जिनियर विष्णुप्रसाद खनालं धुलिखेल मू चोकंनिसें बनेपापाखे बाँसघारीतकया छगू किलोमिटर सतकय् थौंकन्हय् कालोपत्र यायेगु ज्या न्ह्याकूगु जानकारी बियादीगु दु ।
थौंकन्हय् आधुनिक प्रविधि छ्यलाः ब्ल्याकटपया न्हापांगु लेयर दयेकेगु ज्या क्वचायेकाच्वंगु व निगूगु लेयरया ज्या जुयाच्वंगु समाचार वःगु दु । खनालया कथं सतकया मू ब्वय् ८० सेन्टिमिटरया कालोपत्र तइगु जूगु दु । न्हापांगु तह ३० निसें ३५ सेन्टिमिटर ‘सबबेस’, वयां लिपा २० सेन्टिमिटर ‘सीटीपी’, वयां लिपा १० सेन्टिमिटर ‘क्रैक–रिलिफ तह’, वयां लिपा ११ निसें १३ सेन्टिमिटर ‘डीबीएम’, वयां लिपा ६ सेन्टिमिटर ‘डामर आधुनिक कंक्रिट तह’, मुक्कं ८० सेन्टिमिटर ब्ल्याकटप सिङ प्रविधिया निंतिं दयेकेगु ज्या न्ह्याकूगु दु ।
सूर्यबिनायक–धुलिखेल १६ कि.मि. दु । गुकी सूर्यबिनायक-सांगा ७.५ कि.मी., सांगा-धुलीखेल ८.५ कि.मी. दु । उगु दूरीइ ६ लेनया सतक विस्तार स्वदँया दुने क्वचायेकेगु निंतिं निगू खण्ड व निगू चरणय् ठेक्का जूगु खः । सूर्यविनायक–सांगा खण्डया ठेक्का २०७९ सालय् मंगसिर व सांगा–धुलिखेल खण्डया ठेक्का सम्झाैता २०७९ सालया पौषय् जूगु खः ।
निगू सर्भिस लेन व प्यंगू मू लेन यानाः ६ लेन दुगु सतकखण्ड दयेकेगु ठेक्का सम्झौता दु। इन्जिनियर खनालया कथं आःतक सांगा–धुलिखेल सतकखण्डया भौतिक प्रगति थ्यंमथ्यं ५० प्रतिशत क्वचायेधुंकूगु दु । नकतिनि जक न्ह्याःगु स्वंगू किलोमिटरया ब्लाकटप परियोजना असार मसान्ततक क्वचायेकेगु व थ्यंमथ्यं ६० प्रतिशत भौतिक प्रगति यायेगु आज्जु तःगु दु ।
आयोजना अन्तर्गत न्हापांगु चरणय् ४ अर्ब ५६ करोड लागतय् सांगानिसें धुलिखेल तकया ८.४ किलोमिटर सतकखण्ड विस्तार यायेगु सम्झौता जूगु खः । निगूगु चरणय् सुरु याःगु सूर्यविनायक–साँगा सतकखण्ड ३ अर्ब ८८ करोड ९९ लाखय् सहमति जूगु खः ।
चिब्यागु लँया हुनिं दँय्दसं ट्राफिक जाम अप्वयेधुंकाः विस्तारया ज्या न्ह्याकूगु खः । चीनलिसेया सिन्धुपाल्चोकय् च्वंगु चीहाकःगु दूरीया तातोपानी नाका चायेकेधुंकाः थ्व राजमार्गय् न्हियान्हिथं यातायात अप्वया वनाच्वंगु दु । थौंकन्हय् कोटेश्वरं न्हिथं थ्व राजमार्गय् मध्यपहाडी क्षेत्र व पूर्वी तराईया २५०० स्वयां अप्वः ताःहाकःगु दूरीया सवारी साधन चले जुइ ।