देवदास मानन्धर लुमन्ति गुथिया उलेज्या

सामाजिक ज्या धालकि नेवाःत तसकं हे मन क्वसापिं जुया गुलिखय् नेवाःतसें समाजयात हित यायगु ताःतुना थःगु जीवन पाना समाजसेवा याना वनेगु याःगु दसा उकिइ मध्ये भाषासेवी देवदास मानन्धर नं छम्ह जूगु दु । भाषासेवी देवदास मानन्धरं यानादीगु थीथी ज्यायात लुमंकाः लक्ष्मीदास मानन्धर स्मृति प्रतिष्ठानं नेसं ११४५ बछलागा द्वादशी २०८२ साल जेठ १० गते शनिवाः येँया नेपाः ब्याकेटय् देवदास मानन्धर लुमन्ति पुथिया उलेज्या सामूहिक रुपं याःगु दु ।
मदुम्ह भाषासेवी देवदास मानन्धरं थःगु जीवनकालय् गुकथंया ज्या यानावन व वयक नाप सतिपिन्सं वयकःया बारे च्वयातःगु लुमन्तिकथं थुगु सफू प्रकाशन याःगु दु । नेवाः न्हयलुवाः व नेपालभाषा एकेडेमिया नांयः मल्ल के. सुन्दरया मू पाहाँसुइ जूगु थुगु ज्याझ्वलय् मूपाहां मल्ल के सुन्दर, पाहांपिं भिक्षु महासंघया मूछ्याञ्जे साहित्यकार हितकरबीर सिं कंसाकार, प्रा.डा. त्रिरत्न मानन्धरपिन्सं मंकाःकथं थुगु सफू पितव्वज्या यानादीगु खः ।
तःजिक न्हयाःगु थुगु ज्याझ्वलय् देवदास मानन्धरया जहान सरोज मानन्धरं उपस्थितसकसितं लसकुस बियाः लसकुस यानादीगु खः। ज्याझ्ुवःया मूपाहां मल्ल के सुन्दरं उगु ज्याझ्वलय् लुमन्ति पुथि च्वसु च्वयादीपिं १६० म्ह च्वमिपिन्त सुभाय् पौ देछानदीगु खःसा दातापाखें सफू छगू छगू नं देछानादीगु खः । थुकथं हे लुमन्ति पुथि पिकायत बिशेष ग्वाहालि यानादीपिं खुम्हसित लुमन्ति चिं लः ल्हाःगु खः ।
लक्ष्मीदास मानन्धर स्मृति प्रतिष्ठानया नायः नारायणदास मानन्धरया सभापतित्वय् न्ह्याःगु थुगु ज्याझ्वलय् लुमन्ति पुथि सुफूया सम्पादक बिष्णु चित्रकारं सफूयात कयाः थःगु नुगः प्वंकादीगु खः ।कवयित्री प्रतिशरा सायमिं न्ह्याकादीगु उगु ज्याझ्वलय् ज्याझ्वःया मूपाहां मल्ल के सुन्दर, प्रा.डा. त्रिरत्न मानन्धरपिन्सं न. थःथःगु नुगः खँ तयादीगु खः । उगु ज्याझ्ुवलय् मदुम्ह भाषासेवी देवदास मानन्धरया किपातय् पाहांपिं व भाषासेवीपिन्सं स्वां देछाया श्रद्धान्जली प्वंकेगु ज्या नं जूगु खः ।