२५ बुँदे ‘सगरमाथा एक्शन कल’ जारी यासें नेपाल सरकारपाखें न्हापांखुसीइ ग्वसाःग्वःगु ‘सगरमाथा संवाद’ थाैं क्वचाल ।
‘जलवायु परिवर्तन, पहाड व मानवताया भविष्य’ विषयस जूगु संवादया न्हापांगु संस्करण असार २ निसें ४ तक जूगु खः ।
संवादय् जलवायु परिवर्तनया जोखिमय् लाःगु देय्तय्त निगू पक्षीय, बहुपक्षीय व वैकल्पिक स्रोत, वित्तीय संयन्त्रया संचालन निकाय, युएनएफसी व पेरिस सम्झौता अन्तर्गतया कोषपाखें अन्तर्राष्ट्रिय जलवायु वित्तय् न्यायोचित व सरल पहुँच सुनिश्चित यायेत सामूहिक कुतःयात प्रवर्द्धन यायेत आह्वान याःगु दु ।
सरकारं हिमालयया मुद्दायात अझ अन्तर्राष्ट्रियकरण यायेत व विश्वव्यापी मुद्दाय् नेपाःया प्रतिबद्धतायात उजागर यायेत, सहकार्य व साझेदारी विकासया ल्याखं थ्व संवाद उपयोगी जूगु धाःगु दु । प्रधानमन्त्री केपी शर्मा ओलीं संवादया उलेज्या समारोहय् सम्बोधन यासें विश्वं जलवायु परिवर्तन लिसेंया आपालं तच्वःगु हाथ्याया सामना यानाच्वंगु इलय् संवादया परिकल्पना व उकिया महत्वयात न्ह्यब्वयादीगु खः । वय्कलं हाथ्यायात सम्बोधन यायेत ‘सवादया शक्ति’यात बः बियादिल ।
परराष्ट्रमन्त्री डा. आरजु राणा देउवां जलवायुयात कयाः हिमालनिसें टापुतकया सःयात स्वायेगु व उजागर यायेगु ज्याय् जूगु संवादं सफलता प्राप्त जूगु धयादिल । वय्कलं थुगु संवाद संस्करणय् नेता, नीति निर्माता, विज्ञ, शिक्षाविद्, युवा, नागरिक समाज, अन्तर्राष्ट्रिय संगठन, पहाडनिसें टापुतकया समुदायया सःयात वास्तविक संवादया भावनाय् छथाय् हःगु खँ न्ह्यथनादिल ।
संवादया झ्वलय् सहलह जूगु विषय व सुझाव थीथी अन्तर्राष्ट्रिय मञ्चय् न्ह्यःने यंकेगु खँ सरकारं न्ह्यथंगु दु । थुगु महिना क्वचायेकाः ताजिकिस्तानय् जुइगु हिमशृंखला संरक्षण सम्बन्धी उच्चस्तरीय अन्तर्राष्ट्रिय सम्मेलन–२०२५, जुलाईस जुइगु दिगो विकास लक्ष्यया समीक्षा यायेगु उच्चस्तरीय राजनीतिक मञ्च, व सेप्टेम्बरय् जुइगु संयुक्त राष्ट्र संघया महासभाया ८० क्वःगु अधिवेशन नापं ब्राजिलय् जुइगु सीओपी–३ य् थुपिं विषयत न्ह्यःने हइगु जूगु दु । सरकारं मेगु छगू महत्वपूर्ण विषययात कयाः सन् २०२७ य् सगरमाथा संवादया निक्वःगु संस्करण यायेगु घोषणा याःगु दु ।
वन तथा वातावरण मन्त्री ऐनबहादुर शाही ठकुरीं जलवायु परिवर्तनं हिमाली क्षेत्रया इकोसिस्टमय् गुकथं लिच्वः लाकी धइगु बारे विश्व समुदाययात जानकारी बीत जूगु संवाद फलदायी जूगु धयादीगु दु । संवादया माध्यमं नेपाःया संरक्षणय् जूगु उपलब्धिया जानकारी बिइगु व मानव निर्मित प्रकोपं जूगु क्षतिपूर्तिया दावी यायेगु ल्याखं उगु संवाद फलदायी जूगु उल्लेख यानादिल ।
कार्बन उत्सर्जनय् नगण्य योगदान बियाच्वंसां जलवायु संकटया सामना यायेत संघर्ष यानाच्वंगु नेपाः थेंज्याःगु देय्या समस्यायात सम्बोधन यायेगु निंतिं सामूहिक कुतः मालेगुलिइ थुगु संवाद सफल जूगु धयातःगु दु ।
परराष्ट्र सचिव अमृतबहादुर राई नं हिमालयया मुद्दायात अझ उजागर यायेत संवाद सफल जूगु धयादिल । वय्कलं हिमालयया विषययात व्यापक रुपं उजागर याःगु धयादिसें हिमालय क्षेत्रया जक मखु, टापु थेंज्याःगु तापाःगु समुदायया नं चिउताःया विषय जूगुलिं थीथी दृष्टिकोणं सहलह जूगु धयादिल । जलवायुया विषयस क्षेत्रीय व विश्वव्यापी साझेदारीलिसें न्ह्यःने वनेगु विषयस जूगु संवादया झ्वलय् सार्थक सहलह जूगु खँ न्ह्यथसें वय्कलं संवादया माध्यमं नेपाः विश्वय् थःगु छवि थकायेत व जलवायु क्षेत्रं फयेमाःगु हाथ्या व मुद्दायात अझ प्रकाशय् हयेत सफल जूगु धयादिल ।
संवादया पूर्ण सत्रय् न्ववानादीपिं १९ गू देय् व संस्थाया प्रतिनिधितय्सं जलवायु संकटयात सम्बोधन यायेत एकता व एकजुट जुइत आह्वान याःगु दु । उगु संवादय् स्वंगू दर्जनसिबें अप्वः देय्या १७५ म्ह विदेशी व उलि हे ल्याखय् नेपाली सरकारया अधिकारी व विज्ञलिसें ३५० म्ह विशिष्ट व्यक्तिपिन्सं ब्वति काःगु खः ।
संवादया झ्वलय् थीथी १२ गू विषयस समानान्तर सत्र जूगु खः । थुगु अधिवेशनय् नेपाःया थीथी देय् व सरकारी निकायया सम्बन्धित पदाधिकारी व विज्ञपिन्सं थःथःगु अनुभव न्यंकादीगु खः । संवादया झ्वलय् हिन्दूकुश हिमाली क्षेत्रया देय्तय्गु मन्त्रीस्तरीय बैठक जूगु खः । बैठकं हिन्दूकुश हिमालय क्षेत्रया देय्त जलवायु परिवर्तनया जोखिमय् अप्वः लाःगुलिं उगु क्षेत्रया पारिस्थितिकी तंत्रया संरक्षणया निंतिं थप सहकार्यया अन्वेषण यायेमाःगु आवश्यकतायात बः ब्यूगु खः ।
परराष्ट्र मन्त्रालयया सहसचिव व संवादया प्रचार समितिया संयोजक लोकबहादुर पौडेल क्षेत्रीं विश्वव्यापी मुद्दाप्रति नेपाःया प्रतिवद्धतायात उजागर यासें विश्वव्यापी सहकार्य व साझेदारी निर्माणया ल्याखं संवाद उपयोगी सावित जूगु धयादिल । वय्कलं संवादय् पहाडनिसें समुद्रतकया लिच्वः, दिगो हरित अर्थतन्त्र, जलवायु क्षति न्यूनीकरण, जलवायु न्याय व मानवताया भविष्य, क्षेत्रीय व विश्वव्यापी साझेदारी लिसेंया विषयस सार्थक सहलह जूगु धयादिल ।
सगरमाथा संवाद छगू बहुसरोकारवाला संवाद दबू खः । थ्व संवादया नां हलिंया दकलय् तजाःगु शिखर सगरमाथाया नामं तःगु खः । थुकिया आज्जु धयागु मानवताया मंकाः हित व सामूहिक कल्याणया अवधारणायात प्रवर्द्धन यायेगु खः । सरकारं वइगु दिनय् निदँय् छक्वः थ्व संवादया ग्वसाः ग्वयेगु निर्णय याःगु दु ।
संवाद सचिवालयया सदस्य सचिव तकं जुयादीम्ह वन मन्त्रालयया सहसचिव डा. महेश्वर ढकालं नेपाल संवादया माध्यमं संरक्षणय् थःगु बांलाःगु अभ्यासया बारे विश्वयात जानकारी बीत सफल जूगु खँ कनादीगु दु । लिसें वय्कलं जलवायु संकटयात सम्बोधन यायेगु निंतिं विश्वया उत्कृष्ट अभ्यास व समाधानया बारे सीकेत संवाद उपयोगी जूगु खँ नं न्ह्यथनादीगु दु ।
विश्वव्यापी ग्रीनहाउस ग्यास उत्सर्जनय् नेपाःया योगदान न्यूनतम जूसां नं जलवायु परिवर्तनया लिच्वःया कारणं तःधंगु लिच्वः लानाच्वंगु दु। थ्व अवस्थाय् हिमालयया विषयस विश्व समुदायया ध्यानाकर्षण याकेगु व जलवायु संकट समाधानया बारे मंकाः समझदारी दयेकेगु निंतिं संवाद सफल जूगु खः ।