संस्कृति, पर्यटन तथा नागरिक उड्डयनमन्त्री बद्रीप्रसाद पाण्डेले नेपालमा भौतिक तथा अमूर्त सम्पदा अन्तर्राष्ट्रिय मान्यता दु धासें व्यवस्थापन यायेमाः धयादीगु दु ।
अन्तर्राष्ट्रिय संग्रहालय दिवसया लसताय् थौं राष्ट्रिय संग्रहालय शिविरय् ग्वसाः ग्वःगु ज्याझ्वःयात सम्बोधन यासें वय्कलं व्यवस्थापन सुव्यवस्थित यायेफत धाःसा हलिंन्यंकंया इतिहास व संस्कृतिप्रेमीपिन्त नेपालय् ब्वने फइ धयादिल । संग्रहालय न्हूगु पुस्तायात विगतया अवलोकन यायेत महत्वपूर्ण माध्यम जूगु धासें मन्त्री पाण्डें भावी पुस्तां नं अवलोकन याये फयेमा धकाः संग्रहालयया संरक्षण यायेमाःगु खँय् बः बियादिल ।
वय्कलं धयादी, “नेपाःया संग्रहालयय् संकलन यानातःगु वस्तुत अद्वितीय खः, इतिहास व संस्कृति लोप जुइगु खतराय् लाःगु अवस्थाय् संग्रहालय नं उकियात संरक्षण यायेगु छगू माध्यम जुइफु, संग्रहालययात इतिहास व संस्कृतिया केन्द्रया रुपय् स्थापित यायेमाः, कृत्रिम बुद्धिमत्ताया युगय् संग्रहालययात एआईलिसे नं स्वापू तयेमाः ।”
मन्त्री पाण्डें एआईया नापनापं ‘भर्चुअल रियलिटी’ लिसेंया न्हूगु प्रविधियात नं धर्म व संस्कृतिया ख्यलय् समायोजन यायेमाःगु खँय् बः बियादिल । वय्कलं थुगु दिशाय् न्ह्याः वनेमाःगु खँय् सम्बन्धित निकायया ध्यानाकर्षण याकादीगु दु, गथेकि संग्रहालययात गबले, सुनां दयेकूगु खः, अले संग्रहालयय् दुगु वस्तुया बारे छु दयेकूगु खः धइगु जानकारीलिसें कथात्मक शैलीइ न्ह्यब्वयेफःसा स्वः वइपिनिगु ल्याः अप्वइगु व संग्रहालयया प्रचार नं जुइगु वय्कलं धयादीगु दु ।
पुरातत्व विभागया महानिर्देशक सौभाग्य प्रधानाङ्ग पुलांगु व न्हूगु दथुइ सेतुया रुपय् ज्या याइगु संरचना दयेकाः संग्रहालययात व्यवस्थित यायेगु प्रतिबद्धता प्वंकादीगु खः । लिसें वय्कलं वइगु दँनिसें अन्तर्राष्ट्रिय संग्रहालय समितिं नेपालय् संग्रहालय दिवस सम्बन्धी छगू ज्याझ्वःयात नं विश्वव्यापी दयेकेत थःगु ज्याझ्वलय् दुथ्याकेगु जानकारी नं बियादिल । महानिर्देशक प्रधानंगं विभाग अन्तर्गत ८ गू संग्रहालय दूगु जानकारी नं बियादीगु खः ।
मन्त्रालयया संस्कृति महाशाखाया प्रमुख डा. सुरेश सुरेश श्रेष्ठं फुक्क देय्या संग्रहालय व समुदायया अवस्था छगू हे जूगु धयादिसें १५८ गू देय्या ३७ हजार संग्रहालयस थौं थुगु दिवस हनाच्वंगु जानकारी बियादिल । वय्कलं नेपालय् संग्रहालय पलिस्था जूगु सच्छिदँ थ्यंबलय् नं नकतिनि शुरु जूगु थें प्रवाहया अवस्थाय् हे दनिगु धयादिल ।
दिगो विकास लक्ष्यं नं सम्पदा संरक्षणयात महत्व ब्यूगु खँ न्ह्यथनादिसें वय्कलं संस्कृतिपाखें तापाना वनाच्वंगुलिं ल्याय्म्ह पुस्तायात आकर्षित यायेगु हाथ्या दुगु धयादिल । दँय्दसं मे १८ तारिखय् अन्तर्राष्ट्रिय संग्रहालय दिवस हनेगु यानाच्वंगु दुसा थुगुसीया थीम ‘तीव्र रुपं हिलाच्वंगु समुदायय् संग्रहालयया भविष्य’ खः ।