परराष्ट्रमन्त्री डा आरजु राणा देउवां जलवायु परिवर्तनया हुनिं च्वापुगुँनिसें टापुतक पिहांवःगु समस्याबारे सः थ्वयेकेत सगरमाथा संवाद ताःलागु धयादीगु दु ।
वंगु शुक्रबाःनिसें थन न्ह्याःगु सगरमाथा संवादया समापन सत्रय् थौं वय्कलं धयादिल, “संवादया थ्व ब्वं तःजाःगु च्वापुगुँनिसें टापु देय्या नेता, नीति निर्माता, विज्ञत, शिक्षाविद्, युवा, नागरिक समाज, अन्तरराष्ट्रिय सङ्गठन व समुदायया सःयात वास्तविक संवादया भावनाय् छगू हे थासय् हःगु दु ।”
संवादया निष्कर्षया कार्यान्वयन व लक्षित उपलब्धि हासिल यायेत मंकाः कुतः यायेमाःगु धयादीसें मन्त्री डा राणां संवाद छगू ज्याझ्वः जक मखुसें विचाःया सङ्गम व मंकाः भालाया उत्सव जूगु धयादिल । वय्कलं धयादिल, “सगरमाथां झीगु दृढताया लुमन्ति याकुसें अटल जुयाः धस्वानाच्वंथें, थ्व संवादया लिच्वलं झीत झीगु सङ्कल्पया लुमन्ति दयका च्वनेमा ।”
संवादय् लहलह जूगु विषय व सुझाःयात थीथी अन्तरराष्ट्रिय मञ्चय् ल्ह्वनेगु वय्कलं धयादिल । उगु विषय थ्वहे लाया अन्त्यय् ताजकिस्तानय् जुइगु हिमनदी संरक्षणसम्बन्धी उच्चस्तरीय अन्तरराष्ट्रिय सम्मेलन, संयुक्त राष्ट्रसङ्घया ८० क्वःगु महासभा व थ्वहे दँ ब्राजिलय् जुइगु जलवायु परिवर्तनसम्बन्धी राष्ट्रसङ्घीय सम्मेलन कोप–३० लिसेंया अन्तरराष्ट्रिय मञ्चय् ल्हवनेगु वय्कलं धयादिल । सगरमाथा संवादया निक्वःगु ब्वः सन् २०२७य् जुइगु परराष्ट्रमन्त्रीं धयादिल ।