नेवाःतय्गु राष्ट्रिय संगठनकथं धस्वानाच्वंगु नेवाः देय् दबूया च्याक्वःगु तःमुँज्या थनिंनिसें न्ह्याःगु दु । थाैं नवलपरासीया कावासाेतीइ थाैं सुथय् शाेभायात्रा यानाः न्ह्याःगु तःमुँज्याया देय् दबूया संरक्षक नरेश ताम्रकारं उलेज्या यानादीगु खः ।
च्याक्वःगु तःमुँज्याय् नेतृत्वया निंतिं प्यम्हेसिया नां न्ह्यःने वयाच्वंगु दु । थ्व इलय् थःगु कार्यकाल पूवंसां यक्व ज्या ल्यं दनिगुलिं हाकनं छकः थःगु हे नेतृत्वय् दबू न्ह्याके धइगु खँ ज्वनाः नायः पवित्र बज्राचार्य न्ह्यःने वयाच्वंगु दुसा वय्कःया विरूद्धय् वरिष्ठ न्वकु चन्द्रलाल राजभण्डारी, न्वकु रश्मिला प्रजापति व मूछ्याञ्जे सत्यनारायण डंगाेलपिसं नायः पदय् उम्मेदवारी बीगु घाेषणा याये धुंकूगु दु ।
नेवाः देय् दबूया संरक्षक मल्ल के सुन्दरं देय् दबूया नेतृत्व सर्वसम्मतिं ल्ययेत इनाप यासें छगू विज्ञप्ति पितब्यूगु दु ।
कावासाेतिइ देय् दबूया उलेज्या न्ह्यानाच्वंगु इलय् हे उच्च अदालत पाटनपाखें धाःसा तःमुँज्या मन्ह्याकेत अन्तरिम अादेश ब्यूगु दु ।
प्रकाश मान पलिखें जिल्ला प्रशासन ज्याकूलिसेंयात विपक्षी दयेकाः दायर याःगु रिट निवेदनया लिधंसाय् उच्च अदालत पाटनं थुगु अादेश जारी याःगु खः ।
उच्च अदालतं थ्व हे जेठ १२ पेशीया मिति क्वःछिनाः उकुन्हु उपस्थित जुयेत सम्बन्धित विपक्षीपिनि नामय् सूचना जारी यानाः नियमकथं न्ह्यथनेत व उगु मितितक उगु संस्थाया महाधिवेशन याये/याके मते धकाः विपक्षीया नामय् अादेश जारी याःगु दु ।
