नेपाल कम्युनिष्ट पार्टी (माओवादी केन्द्र) या वरिष्ठ न्वकूलिसें राष्ट्रियसभा सदस्य नारायणकाजी श्रेष्ठं तारन्ताः जूगु सङ्घर्षं दुगु संवैधानिक अधिकारया रक्षा यायेत फुक्क राजनीतिक दल छप्पँ जुइमाःगु खँय् बः ब्यूगु दु ।
सङ्घीय संसद् राष्ट्रियसभाया थाैंया बैठकया विशेष इलय् दलीय लिधंसाय् न्वचु तयेगु झ्वलय् श्रेष्ठं तःधंगुं सङ्घर्षपाखें दुगु अधिकारया रक्षा यासें उकिया कार्यान्वयनया निंतिं नं गणतन्त्रवादी शक्तित एकीकृत जुइमाःगु खँ न्ह्यथनादिल ।
लिपांगु इलय् देय्या परिस्थिति तसकं गम्भीर व जटिल मोडय् थ्यंगु खँ न्ह्यथसें वय्कलं नेपाःया सङ्घीय लोकतान्त्रिक, समानुपातिक समावेशी व धर्मनिरपेक्षतालिसेंया अधिकार ल्यंकेगु थाैंया मू चुनौती जूगु खँ कनादिल । वय्कलं देय्या मू विषय सामाजिक व आर्थिक रुपान्तरण जूगु खँ न्ह्यथसें राजनीतिक उपलब्धियात सामाजिक व आर्थिक ख्यलय् विस्तारित यानाः न्ह्यज्याय्माःगु खँय् बः बियादिल ।
सांसद श्रेष्ठं धयादिल, “झीसं राजनीतिक हिउपा हयागु दु, तर जनताया शिक्षा, स्वास्थ्य, लजगाःया समस्या समाधान याये फुगु मदुनि, जनतां काय्खनेमाःगु न्यूनतम सेवा बी फय्केमाः ।” दुगु उपलब्धियात पाय्छिकथं जनताया न्ह्यःने थ्यंकेमाःगु धयादिसें वय्कलं दलतय्सं एकता यायां समन्वय व सहमति यानाः देय्या पक्षय् ज्या याय् माःगु बिचाः प्वंकादिल ।
वय्कलं धयादिल, “नेपाःमि जनतां माःगु व थाैंया आवश्यकताया स्तरया सामाजिक व आर्थिक रुपान्तरणया प्रक्रियायात माःकथं याकनं थासय् थ्यंके मफुगु यथार्थ खः, थ्व खँयात झी सकसिनं स्वीकार याय्माः।” शान्ति प्रक्रियाया ल्यं ज्या पूवंकेमाःगु खँय् बःबिसें वय्कलं सरकारया ध्यानाकर्षण याकादिल ।