नेपाल विद्यार्थी सङ्घं विद्यालय शिक्षा विधेयक याकनं जारी यानाः शिक्षकया जायज माग पूवंकाः याकनं सामुदायिक ब्वनेकुथि चाय्केगु लकस दयेकेत सरकारयाके माग याःगु दु ।
सङ्घं थाैं ग्वसाःग्वःगु पत्रकार सम्मेलनय् प्रधानमन्त्री केपी शर्मा ओलीं हे शिक्षकया माग सम्बोधन यायेत पलाः न्ह्याकेमाःगु माग याःगु दु । शिक्षक आन्दोलनय् दुगु हुनिं थ्वयां न्ह्यः थ्वहे वैशाख ११ गतेनिसें हे कार्यतालिका पिथंसां नं परीक्षा स्थगित जूगुलिं आः क्वःछ्यूगु ई वैशाख २१ गतेनिसें धाःसा परीक्षा जुइगु लकस दयेकेत नायः दोजाङ् शेर्पां माग यानादिल ।
“वैशाख ११ गतेनिसें क्वःछ्यूगु परीक्षा स्थगित यानाः विद्यार्थी तनावय् दु, वैशाख २१ गतेनिसें क्वःछ्यूगु कार्यतालिकाकथं नं परीक्षा मन्ह्यात धाःसा मातृ पार्टी नेपाली कांग्रेसतकं सहभागी सरकारया विरोधय् सतकय् कुहाँ वयेत बाध्य जुइ, शिक्षकयात नं जिम्मेवार जुयाः कक्षाकोठाय् लिहाँ वनेत इनाप याये,” वय्कलं धयादिल ।
त्रिभुवन विश्वविद्यालयया आङ्गिक व सम्बन्धन प्राप्त यानाः ३१३ स्वयां अप्वः क्याम्पसय् जूगु स्वतन्त्र विद्यार्थी युनियनया निर्वाचनय् सङ्घं १२७ क्याम्पसय् सभापति त्याकाः दकले तःधंगु विद्यार्थी संस्थाकथं पुनःस्थापित जूगु नं उगु लसताय् कंगु खः । त्रिविया ९० स्वयां अप्वः क्याम्पसय् अझं स्ववियु निर्वाचन जुइ ल्यं दनिगुलिं याकनं स्वयां याकनं निर्वाचन यायेत नं सङ्घं माग याःगु दु। मध्यपश्चिम विश्वविद्यालयया न्हय्गू क्याम्पसय् स्ववियु निर्वाचन जूगुली खुगुली सङ्घं सभापति त्याकूगु प्रवक्ता सुरज सेजुवालं कनादिल ।
थुकथं हे सुदूरपश्चिम विश्वविद्यालयया १५ क्याम्पसय् स्ववियु निर्वाचन जूगुली गुंगुली सङ्घं सभापति त्याकूग दु । डीन नियुक्तिइ राजनीतिक दबाब बियाः पूर्वउपकुलपति प्राडा केशरजङ्ग बरालं राजीनामा ब्यूगु धासें सङ्घं उच्च शिक्षा विधेयकपाखें प्रधानमन्त्री कुलपतिं चीकेगु व्यवस्था यायेत माग याःगु दु । विद्यालय शिक्षा विधेयकया सन्दर्भय् सङ्घं २०८० असोज २१ गते ब्यूगु सुझावयात विधेयकय् कःघायेत अध्यक्ष शेर्पां माग यानादिल । विधेयकया छुं प्रावधान विद्यार्थीया हितय् मदुगुलिं सङ्घं सुझाव पेश यानागु जानकारी नं पत्रकार सम्मेलनय् ब्यूगु खः ।
अस्थायी, करार व ज्यालादारी शिक्षकयात व्यवस्थापन यानाः खुल्ला प्रतिष्पर्धापाखें शिक्षक नियुक्ति यायेगु व्यवस्था यायेत सङ्घं माग याःगु दु । सरकारी कोषपाखें तलब, सुविधा काइपिनि मस्तय्त सामुदायिक ब्वनेकुथिइ ब्वंकू बापत सरकारं पदकलिसेंया हना बीगु मापदण्ड दयेके माःगु प्रवक्ता सेजुवालं धयादिल ।