युवात दथुइ एकता दःसा न्ह्याबलें देय् विकासय् तिबः जुइगु छगू ज्याझ्वलय् ब्वति काःपिंसं धाःगु दु ।
नेपाल कम्युनिष्ट पार्टी (एमालें) थौं लोकतन्त्र दिवसया झ्वलय् भृकुटीमण्डपय् ग्वसाःग्वःगु ‘यूथ सेलिब्रेसन’ ज्याझ्वलय् थी थी ख्यःया युवातय्सं थःगु प्रतिभा न्ह्यब्वयाः बिचाः तःगु खः ।
येँ महानगरपािलकाया उपप्रमुख सुनिता डङ्गोलं बांलाःगु ज्याया प्रचार यायेत एमालें युवा शक्तितय्त पाय्छिकथं छ्यली धकाः धयादिल । वय्कलं स्टन्ट यानाः देय् दयेकेफइमखु व देय् दयेकेत ज्या यायेमाःगुलिइ बः बियादिल ।
“स्टन्ट यानाः देश दयेकेफइमखु देय् दयेकेगु खःसा ज्या यायेमाः” वय्कलं धयादिल ।
डा आनन्द सिंहं ब्यागलं भूगोल, संस्कृति, भाषा, आचरण व संस्कार नेपाःमितय्त एकता यानातय्गु सुत्र जूगु धयादिल । वय्कलं मुलुक एकताय् स्वानातल धाःसा बिचाः, बौद्धिकता व समावेशिताया ख्यलय् सकारात्मक अभ्यास जुइगु धारणा तयादिल ।
“ब्यागलं भूगोल, संस्कृति, भाषा, आचरण व संस्कार दुपिं झीपिं नेपाःमितय्त एकतां छगू हे खिपतय् गथःचिनातःगु दु”, वय्कलं धयादिल, “एकता न्ह्याबलें जुयाच्वन धाःसा देय् दयेकेफइगु नापं अन्तरराष्ट्रिय जगतय् सकारात्मक सन्देश वनी । एकता भावनाय् जक मखु बिचाः, बौद्धिकता व समावेशिताय् नं दयेमाः ।”
उगु हे ज्याझ्वलय् पृथ्वी नारायण क्याम्पस पोखराया स्वतन्त्र विद्यार्थी युनियन (स्ववियु) सभापति विष्णु पोखरेलं समावेशिता व समानताया हःपाः लोकतन्त्रय् जक सम्भव जुइगु धयादिल । वय्कलं नेपाःयात ला, तरकारी, ख्येँलिसेंया ख्यलय् आत्मनिर्भर दयेकेत सरकारं विशेष ज्याझ्वः हयेमाःगु व युवातय्सं नं नेपाःया अत्थें जुयाच्वंगु जमिनय् बुँज्या यायेगु आँट यायेमाःगुलिइ बः बियादिल ।
अथे हे शिवराज नगरपालिका कपिलवस्तुया उपप्रमुख शिवकुमारी थारुं गणतन्त्र रक्षा यायेत दक्व युवात छवाःछधी जुयाः न्ह्याःवनेमाः धकाः धयादिल ।
“विकास जूगु स्वयेमफुपिं राष्ट्रिय अन्तर्राष्ट्रिय शक्तितय्सं गणतन्त्रयात प्रहार यानाच्वंगु दु”, वय्कलं धयादिल, “युवा शक्तितय्सं अजाःगु शक्तितय्त न्हंकाः न्ह्याःवनेमाः ।”