राष्ट्रपति रामचन्द्र पौडेलं नवनियुक्त शिक्षा, विज्ञान नापं प्रविधिमन्त्री रघुजी पन्तयात पद नापं गोपनियताया शपथ कायेकादीगु दु ।
राष्ट्रपतिया ज्याकुथिइ थौं ग्वसाःग्वःगु विशेष समारोहय् वय्कलं शिक्षामन्त्री पन्तयात शपथ कायेकादीगु खः । समारोहय् उपराष्ट्रपति रामसहायप्रसाद यादव, प्रधानमन्त्री केपी शर्मा ओली, सभामुख देवराज घिमिरे, राष्ट्रियसभा अध्यक्ष नारायणप्रसाद दाहाल, मन्त्रीत, सांसदत, संवैधानिक निकायया प्रमुखलिसेंतय्गु ब्वति दुगु खः ।
नेकपा एमालेया नेता पन्तयात प्रधानमन्त्री ओलीया सिफारिसय् बुधबाः राष्ट्रपति पौडेलं शिक्षामन्त्री नियुक्त यानादीगु खः । वय्कः स्वयांन्ह्यःया शिक्षामन्त्री विद्या भट्टराईं स्वास्थ्यया हुनिं थ्व हे वैशाख ८ गते राजीनामा बियादीगु खः ।
नवनियुक्त शिक्षामन्त्री पन्त समानुपातिक निर्वाचन प्रणालीपाखें प्रतिनिधिसभा दुजः जुयादीम्ह खः ।
