येँ देयया झिगू शाक्यतयगु बहाःयात कःघाना नीस्वनातःगु शाक्य महाविहार संघपाखें ल्हुति पुन्हिया दिं लाका शनिवाः वसन्तपुरय् शाक्य संघदान बरे भ्वय् न्यायकुगु दु । थीथी बहाः बहिया शाक्यतयगु जक उपस्थितिइ न्ह्याकेगु याःगु थुगु बरे संघ भ्वजय् श्री दीपंकर तथागत समक्ष पुजा याना उपस्थितपिन्त संघदान यायगु ज्या नं याःगु खः । शाक्य कुलया परम्पराकथं परापूर्वकालनिसें न्ह्याना वयाच्वंगु थुकथंया बरे भ्वय् तःदँ न्ह्यःनिसें दिनाच्वंगु खःसा थुगु बरे सर्वसंघ भ्वययात निरन्तर बिइगु लागि शाक्य महाविहार संघपाखें साँस्कृतिक पर्वकथं बरे सर्वसंघ भ्वय् न्यायकाःगु खँ संघया महासचिव संघरत्न शाक्यं कनादीगु दू । शाक्य महाविहार संघय् श्रीघः बहाः, नघः, नघः बहाः, नघः, तःधं बहाः, वटु, महाबुद्ध बहाः, महाबौद्ध, स्वः बहाः, यंगा, असं बहाः, असं गल्लि, बिकमाः बहाः, ओम बहाः, यता बहाः, गोफः लगं, क्वहिति बहाः, क्वहिति व क्वंसाः बहाः, ह्युमत दुथ्यानाच्वंगु दुसा थ्व शाक्य सर्वसंघ बरे भ्वययात तःजिक क्वचायेकेत ग्वाहालि यानादीपिं सकसित सुभाय् देछासे संघया अध्यक्ष शुभकाजी शाक्यं नेवाःत संगठित जुया च्वनेमाःगु व थःगु संस्कृति परम्परा यात म्वाका तयेमाःगु खँय् जोड बियादिल ।
