स्वास्थ्य नापं जनसङ्ख्या मन्त्रालयं सरकारी अस्पतालय् ल्वगितय्गु चाप पाः यायेत सुरक्षा निकायं चले यानाच्वंगु अस्पतालतलिसे मंकाःज्याया प्रस्ताव तःगु दु । प्रहरी महानिरीक्षक नापं सेनां चले यानाच्वंगु स्वास्थ्य संस्थाया प्रमुखतलिसे थौं च्वंगु मुँज्याय् स्वास्थ्य नापं जनसङ्ख्यामन्त्री प्रदीप पौडेलं सरकारी अस्पतालय् पाः पियाच्वनेमाःगु अवस्था जुगुलिं सुरक्षा निकायया अस्पतालय् ‘अपरेसन वार्ड’ खाली दःसा सेवा उपलब्ध याकेगु कथं मंकाःज्याया प्रस्ताव तयादीगु खः । मन्त्री पौडेलं धयादिल, “सङ्घीय अस्पतालतय्के ‘सिफ्ट’ तनेगु नापं अतिरिक्त इलय् ज्या यानाः ल्वगितय्गु चाप व्यवस्थापन जुयाच्वंगु दु । सरकारी अस्पतालय् चाप जूगु इलय् सुरक्षा निकायया अस्पतालय् ‘रेफर’ यानाः गथे यानाः उपचार यायेफइ धकाः मंकाःज्या यायेगु आवश्यक जू ।” वय्कलं स्वास्थ्य बिमा ज्याझ्वः सुरक्षा निकायया अस्पतालय् प्रभावकारी दयेकेमाःगु बारे सुझाः बिइततकं इनाप यानादिल । सुरक्षा निकायया अस्पताललिसे मंकाःज्या यानाः सरकारी अस्पतालया चाप व्यवस्थापन यायेत आवश्यक खाका दयेकेत अतिरिक्त सचिव डा टङ्क बारकोटीया नेतृत्वय् वंगु वाय् मन्त्रालयं कार्यदल दयेकूगु खः । अथे हे, मन्त्री पौडेलं आपत्कालीन अवस्थाय् नागरिकतय्गु उद्धारया निंतिं एयर एम्बुलेन्स मदुगुलिं ग्वाहालि यायेत सेनायात इनाप यानादिल । मुँज्याय् प्रहरी महानिरीक्षक बसन्त कुँवर नापं सेनाया उच्च अधिकारीतय्सं नं ब्वति कयादीगु खः ।