झिंखुक्वःगु राष्ट्रिय बालनाटकया निंतिं १४ नाटक ल्यल

 झिंखुक्वःगु राष्ट्रिय बालनाटक महोत्सव लिसें बाल चिसंकिपा ब्वज्या २०८१ या निंतिं झिंप्यंगू नाटक ल्यःगु दु । उगु ब्वज्याय् दुथ्याःगु निगू दर्जन नाटकतमध्ये महोत्सवय् न्ह्यब्वयेया निंतिं झिंप्यंगू ल्यःगु खः । धेंधेंबल्लाखय् ब्वति काःगु निगू दर्जनसिबें अप्वः नाटकमध्यें १४ गू ल्ययागु धयादिसें महोत्सवया कजिं सविन न्यौपानें धेंधेंबल्लाखय् दुथ्याःगु फुक्कं नाटकयात सुभाय् बियादिल । वय्कलं धेंधेंबल्लाखय् ब्वति काःपिं व मकाःपिं यानाः नाटकयात ब्वथलागु सुचंलिसें महोत्सवया धलः थ्व हे वइगु माघ २२ गते पितहयेगु धयादिल । कजिं न्यौपानेया कथं महोत्सवय् होलि एञ्जल्स पब्लिक स्कुलया ‘तारेभिर’, सनसाइन इङ्गलिस बोडिङ स्कुलया ‘स्याडो’, आकाशगङ्गा इन्टरनेशनल स्कुलया ‘रक्त पासो’, दर्शना स्कुलया ‘को चोर’, हिले माध्यमिक विद्यालयया ‘अभागी आरन’, भेलोसिटी स्कुलया ‘तुलसी’, समृद्धि स्कुलया ‘देउकी’ व ‘द अलकेमिष्ट’, मृगशिरा वोल्ड्र स्कुलया ‘लौरो’, काठमाडौँ प्रज्ञा कुञ्ज स्कुलया ‘खेल्ने बेला’, युनाइटेड युनिभर्सल स्कुलया ‘पढ्न त मन लाग्छ’, पिक प्वाइन्ट एजुकेसन नेटर्वकया ‘यशस्वी भवः’, वेष्ट प्वाइन्ट आवासीय माध्यमिक विद्यालयया ‘रमेशको आशाको त्यान्द्रो राजु’ व शैली थिएटरया न्ह्यब्वया कथं छगू नाटक ल्यःगु दु । महोत्सवय् न्ह्यब्वइगु बाल चिसंकिपातय् निंतिं मेगु सुचं पिकायेगु ग्वसाःखलः नं धाःगु दु । फागुण १ गतेनिसें ७ गते तक न्ह्याइगु महोत्सव रातोपुलया शैली थिएटर व कमलपोखरीया रुसी सदन (रुसी सांस्कृतिक व विज्ञान केन्द्र) य् झिंखुक्वःगु राष्ट्रिय बाल नाटक महोत्सव लिसें बाल चिसंकिपा न्ह्यब्वइगु जूगु दु । महोत्सवया धेंधेंबल्लाखय् ब्वति काःगु नाटकयात न्हय्गू विधाय् विशेष सिरपाः बिइगु व धेंधेंबल्लाखय् दुमथ्याःगु नाटकयात हनेगु ग्वसाःखलः नं धाःगु दु ।