सशस्त्र प्रहरी बल नेपालं थःगु २४ दँया इलय् सीमा सुरक्षा, आन्तरिक सुरक्षा, राजस्व, भन्सार व औद्योगिक सुरक्षा नापं विपद् व्यवस्थापनय् थःपिंत क्रियाशील यानावयाच्वंगु दु । सरकारं सशस्त्र प्रहरीयात सशस्त्र सङ्घर्ष, पृथकतावादी ज्याखँ व आतङ्ककारी ज्याखँ नियन्त्रण, सीमा सुरक्षा, हुलदङ्गा व्यवस्थापन, विपद् व्यवस्थापन, महत्वपूर्ण व्यक्ति नापं प्रतिष्ठानया सुरक्षा, राजस्व, भन्सार व औद्योगिक सुरक्षालिसेंया जिम्मेवारी बियातःगु दु । मुलुकया दक्व जिल्लाय् उपस्थिति दूगु सशस्त्र प्रहरीं ‘डेडिकेटेड’ सीमा सुरक्षा बलया कथं थःपिं स्थापित जुइगु कुत यानाच्वंगु दु । भारत व चीनलिसे सीमा स्वाःगु थासय् निसः व ५४ गू ‘बोर्डर आउट पोष्ट’पाखें थःगु कर्तव्य निर्वाह यानावयाच्वंगु दु । देय्या दक्षिणी सीमाय् निसः व १, पूवय् २२, पश्चिमय् २१ व उत्तरय् १० गू बिओपी स्थापना याःगु सशस्त्र प्रहरी बलया सहप्रवक्ता शैलन्द्र थापां राससयात कनादिल । सीमा सुरक्षायात प्रभावकारी दयेकेत सशस्त्र प्रहरीं भारत व चीनया सीमा सुरक्षा संयन्त्रलिसे मंकाःज्या यानाः सीमा सुरक्षा नापं विकास ज्याझ्वः न्ह्याकाः वयाच्वंगु दु । चोरी निकासी–पैठारी जुइगु पनेत देय्यात ग्वाहालि यानाच्वंगु सशस्त्र प्रहरी बलं वंगु आर्थिक दँय् १ अर्ब ६४ क्वति ६ लख ७ द्वः बराबरया चोरीनिकासी नियन्त्रण याःगु खः धाःसा न्ह्यानाच्वंगु आर्थिक दँया खुलाया दुने १ अर्ब ५ क्वति २९ लख ७५ द्वः बराबर राजस्व सङ्कलनय् योगदान बिइधुंकूगु सहप्रवक्ता थापां कनादिल । विसं २०५७ साल माघ ९ गते स्थापना जूगु सशस्त्र प्रहरी बलया हल्चोकय् च्वंगु मू ज्याकुथिइ थौं प्रधानमन्त्री केपी शर्मा ओलीया मू पाहाँसुइ स्थापना दिवस समारोह यायेत्यंगु दु ।