स्वास्थ्य व जनसंख्या मन्त्रालयं चीनय् खनेदुगु धयातःगु ‘मानव मेटाप्न्यूमो भाइरस’ (एचएमपिभी) साधारण भाइरस जक जूगु धाःगु दु । मन्त्रालयं बुधबाः छगू विज्ञप्ति पितबियाः थुकिया बारे संचारमाध्यम व सामाजिक सञ्जालय् म्वाःमदूगु प्रचार जुयाच्वंगु खँय् थःपिनिगु ध्यान सालाकाःगु धासें थुजाःगु हल्लाया ल्यू ल्यू मजुइत इनाप नापं याःगु दु ।
‘चिकुलां श्वासप्रश्वासया संक्रमण अप्वइगु स्वाभाविक कथं कयातःगु दु, मानव मेटाप्न्यूमो भाइरस न्हूगु भाइरस मखु, थ्व नेपालय् न्हापानं खने दूगु साधारण सेखं चायेकीगु भाइरस हे खः, थुकिया परीक्षण, निगरानी व प्रतिकार्यया निंतिं माःगु क्षमता व तयारी नेपालं यायेधुंकूगु दु”, विज्ञप्तिइ धयातःगु दु ।
मन्त्रालयं थुगु भाइरसपाखें गम्भीर समस्या जुइगु म्हो जक संभावना दूूगु व थुकिया संक्रमण खास याना कमजोर प्रतिरक्षा क्षमतादुपिं मनूत, चिधकःपिं मस्त व ज्याथःजिथिपिन्त जुइफैगु धाःगु दु । अथे खःसां मन्त्रालय, स्वास्थ्य सेवा विभाग, इपिडिमियोलोजी व रोग नियन्त्रण महाशाखा, अस्पतालत व प्रयोगशालाय् निगरानी व सजगता अप्वयेकागु मन्त्रालयं धाःगु दु ।
एचएमपिभी, एम्प्क्सलिसेंया संक्रामक ल्वय्या जनस्वास्थ्य मापदण्ड पालना यायेगु पाय्छि जुइगु जूगुलिं व्यक्तिगत सुरक्षाया उपायत (मास्क तयेगु, भीडय् मवनेगु) पालना यायेत मन्त्रालयनं सकसितं इनाप याःगु दु । अथे हे, ल्वःगितय् सतिक/सम्पर्कय् मवनेत, साब्वं लखं ल्हाः सिलेत व स्वास्थ्यय् छुं समस्या वःसा अस्पताल वनाः चिकित्सकयाके माःगु सल्लाह कायेत अले मन्त्रालयया हेल्लो स्वास्थ्य कल सेन्टर या १११५ य् स्वापू तयाः माःगु परामर्श कायेत तकं मन्त्रालयनं इनाप याःगु दु ।