अख्तियार दुरूपयोग अनुसन्धान आयोगय् घुस बीत ध्यबा ज्वना वंम्ह अछामया मेल्लेख गाउँपालिकाया उबलेया प्रमुख प्रशासकीय अधिकृत ध्रुवप्रसाद सापकोटाविरूद्ध बिहीवाः विशेष अदालतय् मुद्दा दायर याःगु दु ।
मेसिनरी सामान खरिदसम्बन्धी उजुरीयात कयाः आयोगया ज्याकू कञ्चनपुरय् छानबिन जुयाच्वंगु इलय् सापकोटा अनुसन्धान अधिकृतया ज्याकुथिइ वयाः कागजातलिसेंया खाम ब्यूबलय् लखछि तका बराबरया घुस ध्यबा लूगु खः । अनुसन्धान अधिकृतं न्यनेकने याःबलय् मुद्दा ज्यंका बीगु निंतिं थः यस्सें हे ध्यबा हयागु धइगु बयान सापकोटां ब्यूगु खः ।
आयोगं बिहीबार सापकोटाविरूद्ध लखछि तका बराबरया बिगो मागदाबी यासें मुद्दा दायर याःगु प्रवक्ता नरहरि घिमिरें कनादीगु दु ।