कायममुकायम परराष्ट्र सचिव अमृतबहादुर राईं २६ म्हम्ह परराष्ट्र सचिवकथं बुधबाःनिसें परराष्ट्र मन्त्रालयया जिम्मेवारी कःघानादीगु दु ।
“झीगु देय् हाथ्या व ह्वःताःया दथुइ लानाच्वंगु दु । उगु हाथ्यातय्त चीकाः ह्वःताःयात देय्या भिंजुइगु ज्याय् छ्यलेत निष्ठापूर्वक वने”, परराष्ट्र सचिवया कार्यभार कायेधुंकाः वय्कलं बिहीबाः सुथय् राससयात कनादिल । देय्यात समृद्धिया लँय् न्ह्याकेत आर्थिक कूटनीतियात प्राथमिकताय् तयाः ज्या यायेगु प्रतिबद्धता नं सचिव राईं यानादिल ।
सन् १९९६ य् निजामती सेवाय् दुहाँझाःम्ह परराष्ट्र सचिव राई सन् २००५ य् उपसचिवकथं परराष्ट्र सेवाय् दुहाँझाःगु खः । वय्कलं परराष्ट्र मन्त्रालयकय् संयुक्त राष्ट्रसङ्घ, अन्तर्राष्ट्रिय सङ्गठनत व अन्तर्राष्ट्रिय कानुन महाशाखाया सहसचिवकथं नं सेवा यानादीधुंकूगु खः ।
मार्च २०१९ निसें जुन २०२३ तक वय्कः संयुक्त राष्ट्रसङ्घया निंतिं नेपाःया स्थायी प्रतिनिधि लिसें डिसेम्बर २०१४ निसें डिसेम्बर २०१८ तक दक्षिण अफ्रिकाया निंतिं नेपाःया राजदूत जुयादीगु खः । कायममुकायम सचिव जुइन्ह्यः वय्कलं परराष्ट्र मन्त्रालयया प्रवक्ताया जिम्मेवारी नं कयादीधुंकूगु खः ।
सार्वजनिक सेवाया न्हापांया दँय् सचिव राईं सन् २००३ निसें २००५ तक संस्कृति, पर्यटन नापं नागरिक उड्डयन मन्त्रालय व सन् २००२ निसें २००३ तक सामान्य प्रशासन मन्त्रालय दुने सेवा यानादीगु खः ।
सन् १९९६ य् महिला, बालबालिका नापं समाजकल्याण मन्त्रालयया शाखा अधिकृतकथं वय्कलं निजामती सेवा न्ह्याकादीगु खः ।
सन् १९७० य् सङ्खुवासभाया चिचिला गाउँपालिकाय् बूम्ह परराष्ट्र सचिव राईं जर्मनीया पोट्सडाम विश्वविद्यालयपाखें सार्वजनिक व्यवस्थापन व त्रिभुवन विश्वविद्यालयपाखें सार्वजनिक प्रशासनय् स्नातकोत्तर यानादीगु खः ।
वंगु मङ्गलबाःया मन्त्रिपरिषद् मुँज्यां वय्कःयात परराष्ट्र सचिवय् पदोन्नति याःगु खः ।