प्रधानमन्त्री केपी शर्मा ओलीं आधुनिक व समृद्ध नेपाः निर्माण यायेत संस्कृत शिक्षाया उन्नयनं महत्वपूर्ण भूमिका म्हितीगु धयादीगु दु ।
प्रधानमन्त्री निवास, बालुवाटारय् थौं जूगु नेपाल संस्कृत विश्वविद्यालय सभाया ७७ क्वःगु मुँज्याय् संबोधन यानादिसें कुलपति ओलीं संस्कृत शिक्षां समाजया विकासया सन्दर्भय् महत्वपूर्ण भूमिका म्हितूगुलिं विज्ञानलिसे स्वाकाः थुकिया संरक्षण, खोज व अनुसन्धानय् सरकारं ध्यान बिइगु धयादिल ।
प्रधानमन्त्री ओलीं नेपाःया आधुनिक शिक्षा विकासया जगकथं दुगु संस्कृत शिक्षां राजनीतिक जागरण हयेगु ज्याय् नं योगदान ब्यूगु व वेदया अर्थ नं विज्ञान जूगुलिं थुगु शिक्षायात न्ह्याकेत विश्वविद्यालय न्ह्यलुवा जुइगु भलसा कयादिल ।
प्रधानमन्त्री ओलीं आःया सरकारं विश्वविद्यालयया भौतिक सम्पतिया रक्षा व स्वर्गद्वारी गुठीलिसें छरपस्ट जुयाच्वंगु जग्गाया पाय्छिकथं जगेर्ना यायेगु नं धयादिल ।
मुँज्याय् सहकुुलपति नापं शिक्षा, विज्ञान व प्रविधिमन्त्री विद्या भट्टराईं राष्ट्रिय शिक्षा नीति, २०७६ कथं उच्चशिक्षायात धेंधेंबल्ला, उत्पादनमुखी व अनुसन्धानमुखी दयेकेमाःगुलिइ बः बियादिल । नव नियुक्त उपकुलपति प्राडा धनेश्वर नेपालं झी प्राचीन ऋषिमहर्षितय्गु तच्वःगु तपस्यापाखें निःसृत संस्कृत वाङ्मयय् ज्ञानविज्ञानया धारा प्रवाहित जुयावयाच्वंगुलिं थुकिया मौलिकताया रक्षाया नापं आधुनिकीकरण यायेगु प्रतिबद्धता यानादिल ।
मुँज्यां आर्थिक दँ २०८१÷०८२ या वार्षिक शैक्षिक ज्याझ्वः नापं आय व्यय (बजेट) पारित याःगु खः ।