नेपाली कांग्रेसया सभापति शेरबहादुर देउवां येँ महानगरपालिकाया पूर्वप्रमुख पिएल सिंह देय्या प्रजातान्त्रिक आन्दोलनया अथक योद्धा खः धयादीगु दु ।
नेपाली कांग्रेस जिल्ला कार्यसमिति येँपाखें मदुम्ह सिंहया १३ न्हुया पुण्यतिथिइ थौं जूगु श्रद्धाञ्जलीसभाय् पूर्वप्रधानमन्त्री देउवां जनसम्पर्क नापं लोकप्रियताया आधारय् वय्कः समकालीन नेतातमध्ये तसकं न्ह्यःने लाः धयादिल ।
सभापति देउवां प्रजातान्त्रिक आदर्श नापं सिद्धान्तप्रति प्रतिबद्ध वय्कः लौहपुरुष गणेशमान सिंहया छेँजः जक मखुसे दक्व स्वनिगलय् च्वंपिनिगु सेवाय् थःगु जीवन पानादीम्ह धयादिल ।
नेपाली कांग्रेसया संस्थागत साङ्गठनिक विकासय् वय्कलं म्हितूगु भूमिकायात च्वछानादिसें स्वर्गीय सिंहं क्यनादीगु लँपुइ इमान्दार जुयाः वनेत पार्टीया नेता व कार्यकतातय्त आह्वान यानादिल ।
उपप्रधानमन्त्री नापं सहरी विकासमन्त्री प्रकाशमान सिंहं प्रजातान्त्रिक सिद्धान्त व आदर्शया राजनीतियात सिंहं निष्ठा ज्वनाः अनुशरण यानादीगु धयादिल ।
स्वास्थ्य नापं जनसङ्ख्यामन्त्री प्रदीप पौडेलं देय्या लोकतान्त्रिक आन्दोलनय् स्वर्गीय नेता सिंहं निष्ठाया राजनीति याइम्ह आदर्श योद्धाकथं थःयात नीस्वंगु धयादिल ।
नेपाली कांग्रेसया पूर्वमहामन्त्री कृष्णप्रसाद सिटौलां जनताया अधिकारया निंतिं न्ह्याबलें न्ह्यःने च्वनाः मदुम्ह सिंहं राजनीति यानादीगु लुमंकादिल ।
नेपाली कांग्रेसया नेतात राजेन्द्र केसी, सबुजकृष्ण बानियाँ, भीमसेनदास प्रधान, गोकर्ण केसी व जीवन डङ्गोललिसेंया वक्तातय्सं स्वनिगलय् पार्टीया सङ्गठन गथे यानाः चकंकेगु धइगु शिक्षा मदुम्ह सिंहपाखे कायेमाःगु धयादिल ।
विसं २०५२ मङ्सिर २९ गते येँ नगरपालिकायात पिएल सिंहया नेतृत्वय् महानगरपालिका घोषणा याःगु खः ।