प्रधानमन्त्री केपी शर्मा ओलीं दक्व नेपाःमि शान्तिपूर्ण, हनाबना, समृद्ध व सुखी जुयाः म्वाये दइगु अवस्था सृजना यायेत सयेकूगु ज्ञान छ्यलेत इनाप यानादीगु दु ।
त्रिभुवन विश्वविद्यालयया थौं जूगु ५० क्वःगु दीक्षान्त समारोहय् विश्वविद्यालयया कुलपति प्रधानमन्त्री ओलीं समाजयात लोकतान्त्रिक, सु–संस्कृत व इमान्दारपूर्ण दयेकेत व विद्यावान् जुल धइगु छुं नं घमण्ड मयासे विनयशील जुइत नं इनाप यानादिल ।
प्रधानमन्त्री ओलीं उपाधि कायेधुंकाः अध्ययन पूमवनीगु तर्क तयादिसें सयेकागु ज्ञानयात व्यावहारिक जीवनय् छ्यलाः परिस्कृत यायेत इनाप यानादिल ।
“थःके दूगु विद्या व्यवहारय् छ्यलेमफत धाःसा उगु विद्या ज्या लगे जुइमखु । ज्ञानयात व्यावहारिक कथं व समाजया मुक्कं पक्षया भिं जुइगुलिइ छ्यलेमाः” प्रधानमन्त्री ओलीं धयादिल, “झीसं देसय् दयाच्वंगु २० प्रतिशतया निरपेक्ष गरिबी मदयेकेगु अभिभारा कायेमाः । समृद्ध नेपाल, सुखी नेपाःमिया राष्ट्रिय आकाङ्क्षाया यात्रायात झीसं न्ह्याकायंकेमाः ।”
प्रधानमन्त्री ओलीं झीगु देय् ज्ञान, ध्यान, योग व तजिलजिया भूमि जूगु न्ह्यथनादिसें पुर्खाया ज्ञानप्रति कृतज्ञ जुयाः वय्कःपिंपाखें सयेकाकायेमाःगुलिइ बः बियादिल ।
मू पाहाँ अर्थशास्त्री डा रामप्रकाश यादवं विद्यार्थी जीवनया सङ्घर्ष व इमानदारीतां न्ह्याम्हेसित नं आज्जुइ थ्यंकेत सफल जुइ धयादिल ।
सहकुलपति नापं शिक्षा, विज्ञान व प्रविधिमन्त्री विद्या भट्टराईं अध्ययन–अध्यापनय् प्रविधिया छ्यलाबुला अप्वकेमाःगुलिइ बः बियादिल ।
विश्वविद्यालयया उपकुलपति प्रा डा केशरजङ्ग बरालं विश्वविद्यालय मातहतया क्याम्पसत दुथ्याकेगु नीति काःगु नं कनादिल ।