नेपाल पत्रकार महासंघया संस्थापक नायः सत्यनारायण बहादुर श्रेष्ठया बुन्हिया लसताय् लःल्हाना वयाच्वंगु सत्यनारायण बहादुर श्रेष्ठ प्रेस स्वतन्त्रता सेनानी सिरपाः थुगुसी नेपाल आदिवासी जनजाति पत्रकार महासंघ (फोनिज)यात लःल्हाइगु जूगु दु ।
वि.सं. २००८ सालय् नेपाल पत्रकार संघ स्वनादीम्ह श्रेष्ठया इतिहासयात लिकुंकाः नेपाल पत्रकार महासंघं २०१२ सालय् स्वक्वःगु दँमुँज्यां भट्टराइया नां राजनीतिक लाभया लोभं न्ह्यःने हयाच्वंगु व उकियात भिंकेमाःगु माग यासें नेवाः पत्रकारलिसें आदिवसाी जनजाति पत्रकारत छगू दशक न्ह्यःनिसें आन्दोलित जुयाच्वनागु नेवाः पत्रकार राष्ट्रिय दबूया नायः नृपेन्द्रलाल श्रेष्ठं कनादीगु दु ।
वि.सं. १९७२ पुस १३ गते बूम्ह सत्यनारायण बहादुर श्रेष्ठ २०६० जेठ ९ गते मदुगु खः ।
बुन्हि हना लिसें सिरपाः ज्याझ्वःया कजिलिसें दबूया छ्याञ्जे राजु नापितं सत्यनारायण बहादुर श्रेष्ठयात न्याय बीकेगु निंतिं दबू व फोनिज निरन्तर न्ह्यज्यानाच्वंगु व थीथी पत्रकार पुचःत सहमत जुइ धुंकूगु खँ कनादिल ।
सत्यनारायण बहादुर श्रेष्ठया बुन्हिया लसताय् थ्वहे पुस १० गते बुधवाः यलया एभीएम स्कूलय् निक्वःगु सत्यनारायण बहादुर स्मृति मिडिया कप फुटसल कासा जूगु खः । गुगु कासाय् हलिं नेवाः दबू नेपाः देय् मूकवः न्हाप लाःगु खःसा राष्ट्रिय समाचार समिति ल्यू व १६ वडा कलाकार समिति लियांल्यू लाःगु खः ।
थुकथं हे उखुन्हु हे जूगु नेवाः मिसा कलाकार व नेवाः मिसा पत्रकार दथुइ जूगु मैत्रीपूर्ण कासाय् पत्रकार पुचलं सिरपाः त्याकूगु खः ।
