प्रधानमन्त्री केपी शर्मा ओलीं आःया सरकार सामाजिक सुरक्षाया बृहत्तर व परिपूर्ण अवधारणायात न्ह्याकेत प्रतिबद्ध दूगु धयादीगु दु ।
न्हय्क्वःगु सामाजिक सुरक्षा दिवसया झ्वलय् थौं भिंतुना बिसें वय्कलं सामाजिक सुरक्षा योजनायात व्यवस्थित ढङ्गं सञ्चालन व उकियात पूवंकेत सरकारया ध्यान वनाच्वंगु दु धकाः धयादिल ।
“आः सुनां नं अनाथ जुल धाये म्वाःल, अनाथ जुयाः नं जित अभिभावकत्व मदु धायेगु स्थिति जुइ मखु, जित सुसाकुसाःयाइपिं सुं नं मदु धायेगु अवस्था सुयातं जुइ मखु । जिगु सहारा सुं नं मदु धायेगु अवस्था नं जुइ मखु”, प्रधानमन्त्रीं भिंतुना बिसें धयादीगु दु, “उकिया निंतिं देय् दु अले सरकार दु ।”
आःया सरकार सामाजिक न्याय व समानतालिसें समृद्धिया यात्राय् न्ह्यानाच्वंगु जनताया सरकार खः धासें प्रधानमन्त्रीं देय् व जनताप्रति निष्ठा व प्रतिबद्धता दूगु थ्व सरकारं सुयातं नं याकःचा व असहाय जुइके मबिइगु ध्वाथुइकादिल ।
वय्कलं सुयात नं थः याकःचा धकाः महसुस मयायेत व सरकार नापं दु धैगु भलसा ज्वनाः न्ह्याःवनेत इनाप नापं यानादीगु दु ।
नेपाःया संविधानय् सामाजिक सुरक्षायात नागरिकया मौलिक हकया कथं व्यवस्था जूगु न्ह्यथँसें प्रधानमन्त्री ओलीं संविधानया मर्मकथंया हे सामाजिक सुरक्षासम्बन्धी अवधारणायात चकंकाः यंकूगु ध्वाथुइकादिल ।
“उगु अवधारणाकथंया कार्ययोजनात तयार यायेगु, उकियात नीति ज्याझ्वः व बजेटय् दुथ्याकेमाःगु आवश्यक जू व जिमिसं उकियात छसिंलाक न्ह्याकाच्वनागु दु”, प्रधानमन्त्रीं धयादीगु दु ।
विसं २०५१ नेपाल कम्युनिष्ट पार्टी (एमाले)या उबलय्या सरकारं सामाजिक सुरक्षाया ख्यलय् ज्येष्ठ नागरिक, छम्ह मिसा, असहाय व अशक्त आदितय्त कःघायेगु नीति काःगु लुमंकुसें वय्कलं वयां लिपातिनि लोककल्याकारी देय्, सामाजिक न्याय, समानता व सामाजिक सुरक्षाया अवधारणां मूर्तरुप कयाहःगु धयादिल ।
“थनतक वयाबलय् झीसं सामाजिक सुरक्षायात झीगु सामाजिक जीवन, देय् व समाज सञ्चालनया छगू मजिमगाःगु अङ्गया कथं थुइकाच्वनागु दु व उगुकथंया व्यवहार यानाच्वनागु दु”, प्रधानमन्त्री ओलीं धयादीगु दु ।
हरेक नागरिक थःम्हेसिनं नं सामाजिक सुरक्षाया सन्दर्भय् योगदान बिइमाः धकाः सरकारं योगदानय् आधारित सामाजिक सुरक्षाया अवधारणा न्ह्याकूगु वय्कलं धयादिल ।