बिपी कोइराला मेमोरियल अस्पतालं मस्तय्गु क्यान्सर ल्वय्या सितिकं वासः यायेगु ज्या न्ह्याकूगु दु । अस्पतालं न्हापानं खाता, नयेगु नँसा, रेडियो थेरापी सितिकं यानावयाच्वंगु खःसा आः वया वासः नं सित्तिकं यायेत्यंगु खः ।
अस्पतालया कार्यकारी निर्देशक डा शिवजी पौडेलया कथं डिसेम्बरया लिपांगु न्हि तकया दुने विश्व स्वास्थ्य संगठन (डब्लुएचओ) पाखें केमोनापनापं मचा क्यान्सर ल्वय्या ३५ ताजि वासः सितिकं यायेत्यंगु दु ।
वासःत मवःतले आःयात अस्पतालं हे वासः बिया वयाच्वंगु दु ।
वय्कलं धयादिल, “मन्त्रालयनं स्रोत क्वछिनाब्यूगुलिं आः जिमिसं फुक्क वासःतनापनापं सितिकं उपचार यायेगु ज्या न्ह्याकाःगु खः ।”
अस्पतालया उपनिर्देशक डा उमेश नेपालया कथं थुगु अस्पतालय् क्यान्सरया मचा ल्वगितय् चाप यक्व हे दु । वय्कलं धयादिल, “ल्वगित यक्व दु, सितिकं वासः यायेबले अस्पतालयात तःधंगु भार जुइ धकाः धायेधुंका स्वास्थ्य मन्त्रालयं वासःया स्रोत क्वछिनाबिइगु बचं बिल ।”
लिपा पलेसा कायेगु याना आःयात अस्पतालं हे केमोनापनापं मेगु वासः मिलेयानाच्वनागु उपनिर्देशक डा नेपालं धयादिल । अस्पतालया मचा क्यान्सर ल्वय् विशेषज्ञ डा कृष्णसागर शर्मां न्हापांगु इलय् हे मस्तय् क्यान्सर म्हसिके फुसा लंके अःपुइगु धयादिल ।
नेपालय् दँय्दसं द्वःछि व न्यासःया ल्याखं न्हूपिं मचा क्यान्सर ल्वगित अप्वःया वनाच्वंगु दु धइगु जिमिगु अनुमान दु धकाः वय्कलं धयादिल । उपिंमध्ये बच्छिजक वासःया पहुँचय् वयाच्वंगु नं वय्कलं तनादिल ।
वय्कलं धयादिल, “गुलिखय् मस्तला क्यान्सर जूगु हे मसिकं सिनावनाच्वंगु दु । गुलिसिनं विदेश वना वासः याकाच्वंगु दु । अथेजुसां ५० प्रतिशत मस्त क्यान्सर अस्पतालया पहुँचं पिने हे लानाच्वंगु दयेमाः धयागु जिमिसं अनुमान यानाःगु दु ।”
मस्तय् क्यान्सरया वासः पूवंक सितिकं यायेगु जुलिसें अस्पतालया पहुँच पिने लानाच्वंपिं मस्तय्त नं वासः यायेफइगु लकस बनेजुइगु खँय् वय्कलं भलसा प्वंका दिल ।