चिलिमेया सहायक कम्पनी साञ्जेन जलविद्युत कम्पनी लिमिटेडं दयेकूगु साञ्जेन जलविद्युत् आयोजनाया बिजुली राष्ट्रिय प्रणालीइ स्वाःगु दु । शुक्रबार सनिलय् उगु आयोजनाया न्हापांगु युनिटं उत्पादन याःगु बिजुली राष्ट्रिय प्रणालीइ स्वाःगु खः ।
रसुवाया आमाछोदिङ्मो–५ स दयेकूगु उगु आयोजनाया क्षमता ४२ दशमलव पाँच मेगावाट दु । फुक्क प्राविधिक परीक्षण क्वचायेकाः न्हापांगु युनिटं उत्पादन जूगु विद्युत् राष्ट्रिय प्रसारण लाइनय् स्वानागु आयोजनाया सब इञ्जिनियर रबिन कोइरालां कनादिल । वय्कःया कथं शुक्रबार छगू युनिटं पाँच मेगावाट बिजुली उत्पादन जूगु दु ।
उगु आयोजनाया ल्यं दनिगु निगु युनिटया नं आइतवाःतक परीक्षण यानाः केन्द्रीय प्रणालीइ स्वायेगु तयारी जुयाच्वंगु कम्पनीया प्रमुख कार्यकारी अधिकृत अर्पणबहादुर सिंहं कनादिल ।
‘क्यास्केड मोडल’य् दयेकूगु अर्धजलाशय प्रकृतिया निगू आयोजनामध्ये साञ्जेन (च्वय्या) जलविद्युत् आयोजना २०८० भदौ मसान्तय् क्वचायेकाः विसं २०८० असोज २१ गतेनिसें राष्ट्रिय प्रणालीइ बिजुली उपलब्ध याका वयाच्वंगु खः ।
कुल ११ केभी क्षमताया आपत्कालीन प्रसारण लाइनपाखें व्यापारीक रुपय् बिजुली प्रवाह जुयाच्वंगु दु । उगु आयोजनाया विद्युत् प्रवाहया नीति कम्पनीं हे च्यागू किलोमिटर ११ केभी डबल सर्किट प्रसारणलाइन व १३२/११ केभी सबस्टेसन दयेकेगु ज्या क्वचायेकूगु दु ।
चिलिमे त्रिशूली ६६ केभी प्रसारण लाइनय् क्षमताया सीमितताया हुनिं थ्यंमथ्यं च्यागू दशमलव न्यागू मेगावाट विद्युत् वैकल्पिक रुपय् मियाः आतक करिब रु ३० करोड आम्दानी यायेधुंकूगु दु ।
साञ्जेन तथा साञ्जेन (च्वय्या) निगुलिं आयोजना २०७२ सालया भूकम्प, कोभिड–१९, नाकाबन्दी, राष्ट्रिय प्रसारण लाइन उपलब्ध मजूगु लिसेंया कारणं क्वःछिनातःगु इलय् क्वमचाःगु खः । छुं ई न्ह्यः चिलिमे–त्रिशूली निसः २० केभी प्रसारण लाइन दयेेके क्वचायेवं उगु आयोजनापाखें विद्युत् उत्पादन यानाः राष्ट्रिय प्रसारण लाइनय् स्वायेत ताःलाःगु कम्पनीं धाःगु दु ।
नेपालय् निर्माणाधीन अर्धजलाशययुक्त आयोजनामध्ये नमूना आयोजना जूगु कम्पनीं धाःगु दु । साञ्जेन च्वय्या जलविद्युत् आयोजनाया बाँधस्थलय् करिब ४४ हजार घनमिटर क्षमताया लः मुंकाः राष्ट्रिय विद्युत् प्रणालीयात ७० मिनेट अःपुके फइगु सकिने ‘पिकिङ पोखरी’ दयेकूगु दु ।
उगु पुखूया लः मुंकाः सनिलय् थप बिजुली उत्पादन यानाः राष्ट्रिय विद्युत् प्रणालीइ उल्लेखनीय योगदान बी फइगु आयोजनाया प्रमुख कार्यकारी अधिकृत सिंहं कनादीगु दु । उगु पिकिङ पोखरीया हुनिं आयोजना मर्मतसम्भार यायेत व ‘इमर्जेन्सी ब्रेकडाउन’य् तकं पावरहाउस सञ्चालन याये फइगु वय्कःया धापु दु ।
नेपालय् दुगु क्यासकेड आयोजनामध्ये विशेष प्रविधि जडान यानाः साञ्जेन च्वय्या आयोजना मर्मतसम्भार याइबलय् नं क्वय्या आयोजना निरन्तर विद्युत् उत्पादन याये फइगु नेपाःया हे न्हापांगु आयोजना जूगु कम्पनीया सचिव घनश्याम श्रेष्ठं कनादिल ।
नेपालय् नमूना प्रविधिकथं न्हापांखुसिइ स्वंगु उगु प्रविधि वइगु न्हि मेमेगु क्यासकेड आयोजना स्वनाः क्यासकेडया क्वय्या आयोजना च्वय्या आयोजनाय् जुइगु निर्भरता म्हो याये फइगु वय्कलं कनादिल ।
जर्मनीइ दयेकूगु छगू कथंया अत्याधुनिक प्रविधिया उपकरणया हुनिं कम्पनीयात आयोजना मर्मतसम्भार ईया हुनिं जुइगु क्षति पनाः आर्थिक रुपय् यक्व राहत बी फइगु श्रेष्ठं कनादिल । उगु हे विशेषताया हुनिं काठमाडौं विश्वविद्यालयं उगु आयोजनाया नमूना थःगु प्रयोगशालाय् तकं सञ्चालन याःगु दु ।
हाल नेपालय् विकास याःगु क्यास्केड आयोजनामध्ये थ्व नमूना आयोजना जूगुलिं जलविद्युत् विकास, नवीकरणीय ऊर्जा, हाइड्रोलोजी, दिगो विकास लिसेंया विषयस अध्ययनरत विद्यार्थीया प्रयोगात्मक अध्ययन–अनुसन्धानया नीति तकं छ्यले फइगु कम्पनी सचिव श्रेष्ठया धापु दु ।
साञ्जेन (च्वय्या) जलविद्युत् आयोजनाया सिभिल निर्माण ज्या इसिआई बर्जगुरु, इलेक्ट्रोमेकानिकल निर्माण ज्या हलिंया हे तःधंगु टर्वाइन निर्माणकर्तामध्ये छगू चिनियाँ कम्पनी डोङफोङं याःगु खः सा हाइड्रो मेकानिकल निर्माण स्वदेशी कम्पनी नेपाल हाइड्रों याःगु खः ।
कम्पनीं निर्माणाधिन ४२ दशमलव पाँच मेगावाट क्षमताया साञ्जेन जलविद्युत् आयोजनाया तकं सकतां दयेके ज्या पूवंकाः परीक्षण उत्पादन न्ह्याकूगु खः । थुकिं चिकुलां जुइगु प्रणालीया असन्तुलन छुं हदतक समाधान यायेत ग्वाहालि जुइगु भलसा काःगु दु ।