नेपाःमिपिनिगु तःजिगु नखःकथं कयातःगु माेहनी थनिंनिसें सुरू जूगु दु ।
माेहनी नखःया न्हापांगु न्हि थाैं छेँय् छेँय् नःला स्वनेगु नेवाःतय् चलन दु ।
नेवाः समुदाय दुने नं येँ देय्या क्वःने लागाय् लाःगु थासय् धाःसा नःला स्वनेम्वाः । मूलतः पचली भैरव द्यः जात्रा जुइगु लागाय् च्वंपिसं छेँय् नःला स्वनेगु याइमखु । पचिमह्रः खुन्हु पचली भैरवयात छाइगु कन्हाय् स्वां हे थनयापिसं माेहनीया मू स्वांकथं कयावयाच्वंगु दु ।
माेहनी नखःया झ्वलय् हे पचली भैरवया जात्रा जुइ । थुगु जात्राया निंतिं पचली भैरव लागाय् च्वंगु यःसिं ख्यलय् यःसिं थनेगु प्रचलन दु । थुगुसी वंगु शनिवाः च्वबहाःया गुं यःसिंया निंतिं सिँ हयेगु क्वःछिनातःगु खःसा उखुन्हु तच्वकं वा वयाः थाय्थासय् चलःतकं वंगुलिं पुजा जक यानाः गुथियारत लिहाँ वःगु खः । उगु सिमा साेमवाः धिमे बाजंलिसें वंगु पुचलं पालाः मतुलीइ थ्यंके हःगु खः ।
पचली जात्राया झ्वलय् थाैं पचली भैरवया त्यपयात समाः यायेगु निंतिं पुंया छेँय् यंकी । थाैं सनिलया ५ ता इलय् गुथियारपिसं यायेमाःगु सकतां ज्या पूवंकाः पचली भैरवया त्यपयात पुंयाथाय् यंकीगु खँ सीदुगु दु ।
थुकथं हे पचली भैरव जात्रा झ्वलय् असाेज १९ गते शनिबार तृतीया खुन्हु सनिलय् ४ ताः इलय् बिधिवत गुरूजु पल्तन व बाजागाजा सहित जात्रा यानाः यःसिं ख्यलय् यःसिं थ्यंकीगु जूगु दु ।
असाेज २० गते आइतबार सुथसिया ८ ताः इलय् बिधिवत पुजा याना गुरूजु पल्टन सहित यः सिं थनीगु व असाेज २१ गते साेमबार ४ः०० ता इलय् क्वहिती थकुजुजुयाथाय् द्यः बिज्याकीगु अनं ४ः३० ताः इलय् थकुजुजुयाथासं गमय् झासु फल्चाय् बिज्याकीगु, ५ः३० इलय् झासु फल्चां गमय् बिज्याकीगु जूगु दु ।
थुखुन्हु बहनीया ७ः००ताः इलय् गथु बाजं थ्यंकीगु ८ ताः इलय् गलपय् थनेगु, ८ ताः इलय् मांसाहारी हाेम थकुजुजुं याइगु क्वःछिना तःगु दु ।
असाेज २२ गते मंगलबार द्यः थाहा बिज्याइ । थुखुन्हु ११ः०० ताः इलय ताः कायेगु , १ ताः इलय् गणेद्यःया पुजा, २ ताः इलय गुथियारया पुजा, ३ः३० ताः द्याेसिं पुजाः , ५ ताः गुरूजु पल्टन थ्यंकेगु, गणेद्यः गमय बिज्याकेगु ,अजिमाया तयारी, ०५ः१५ ताः इलय् बिधिवत पुजा ०५ः३० ताः इलय् गमं थनेगु , ७ः३० ताः इलय् हनुमानढोका थ्यंकेगु , ९ः०० बजे श्वेत भैरव थ्यंकेगु ,०९ः१० ताः इलय् गाेफः त्वालय् लसकुस यानाः द्यः दुकायेगु गुथियारपिनि दथुइ सहलह जूगु सीदुगु दु ।
आश्रिन २४ गते बिहीबार सुथसिया ९ ताः इलय् यः सिं क्वथलेगु ज्याझ्वः तयातःगु दुसा यःसिं क्वःथलेवं पचिमह्रः जात्राया सकतां ज्या पूवनी ।
थ्यंमथ्यं ५० दँतक दिनाच्वंगु पचिमह्रःया यःसिं थनेगु ज्या थगुनेनिसें हाकनं न्ह्याकूगु खः ।