कामपा १८ वडाया ग्वसालय् अध्यक्ष न्हुच्छेकाजी महर्जनया प्यपु म्येया म्यूजिक भिडियो व छपु अडियो म्ये असोज १८ गते शुक्रवाः खुसिबुँया नेपाः बैक्वटय् उलेज्या जुल ।
पूर्व मन्त्रिलिसें सांसद कृष्ण गोपाल श्रेष्ठं त्वाःदेवाय् मत च्याका नापं म्ये क्यनेत कम्यूटरया बटन तिया उलेज्या यानादीगु खः ।
महर्जनं च्वयादीगु म्ये थीथी कलाकारपिन्सं हालातःगु खःसा संगीत नं थीथी व्यक्तित्वपिनिगु दु ।
उलेज्याझ्वलय् छपु म्ये क्यने क्वचायेवं म्येलिसे स्वापु दुपिं कलाकार व ग्वाहालिमिपिन्त दसिपौ लःल्हागु खः ।
च्वमिलिसे कलाकार महर्जनया बारे सभासद कृष्ण गोपाल श्रेष्ठ, विद्या सुन्दर शाक्य व वरिष्ठ कलाकार पवन जोशीपिन्सं नुगः खँ कनादीगु खः । थ्व हे ज्याझ्वलय् वडा अध्यक्ष नापं रचनाकार महर्जनयात थीथी संघ संस्थां हनेज्या याःगु खः ।
च्वमि महर्जनयात नेवाः साधना कला केन्द्र, श्री भक्त विद्याश्रम मा.वि रक्तकालि, ह्याउँम्ह किसी संरक्षण खलः किलागल, किलाघः त्वाः मिसा पुचः किलागल, नेपाल इआइटो तथा केन्दो संघ, नेपाल कम्युनिष्ट पार्टी एमाले १८ वडा समिति, देक्व विकास समाज देक्व १८ वडा पाखें दसिपौ लल्हानाः छाय्पिउगु खः ।
१८ वडाया सचिव सरस्वति मानन्धरं लसकुस न्वचु बियाः न्ह्याकुगु ज्याझ्वलय् मिसा सदस्य हेराशाभा महर्जनं ज्याझ्वः न्ह्याकादीगु खःसा वडा अध्यक्ष महर्जनया हे अध्यक्षताय् ज्याझ्वः जुगु खः ।
