नेवाः संस्कृति व सम्पदायात मतिना याइम्ह वडा अध्यक्षकथं म्हसीका दयेकूम्ह नेपालभाषा साहित्य ख्यलय् म्ये च्वमिकथं नांजाःम्हलिसें लिपांगु इलय् म्यूजिक भिडियाे ख्यलय् अभिनय तकं यानादीम्ह वडा अध्यक्ष न्हुछेकाजी महर्जनया च्वसां पिज्वःगु प्यपु म्येया म्यूजिक भिडियाे थ्व हे असाेज १८ गते शुक्रवाः नेपाः ब्याङ्क्वेटय् पितब्वज्या याइगु जूगु दु ।
महर्जनया च्वसां पिज्वःगु नेपालभाषाया म्येत मतिनाया सर्गतय्, गुँया कापिं हायाच्वंगु, छंगु मतिना व मांया यःम्ह मचा यानाः प्यपु म्येया म्यूजिक भिडियाे छक्वलं पितब्वज्या यानादीत्यंगु खः ।
येँ मनपा १८ वडाया ग्वसालय् जुइगु पितब्वज्या ज्याझ्वलय् थीथी सांस्कृतिक न्ह्यब्वया नं दइगु ग्वसाः खलकं जानकारी ब्यूगु दु ।
पितब्वज्या जूगु म्ये मध्ये मतिनाया सर्गतय् म्येय् राेजी डंगाेल श्रेष्ठया सः व मनराजा नकःमिया लय् दुसा थुगु म्ये स्ट्रिङ् रिकर्डिङ्ग स्टूडियाेस हरि शरण साय्मिं रेकर्ड यानादीगु खः । थुगु म्येय् विनाेद कुमरा भुजेलया बाजं ग्वसाः न्यने दइ । म्येया म्यूजिक भिडियाेया निर्देशन व काेरियाेग्राफी सुरज नापितं यानादीगु खः । थुगु म्यूजिक भिडियाेय् अनुज शाक्य व हस्ना महर्जनया मू अभिनय खनेदु । म्यूजिक भिडियाेया छायांकन व सम्पादन साेहन मानन्धर यानादीगु दु ।
थुकथं हे गुँया कापिं हायाच्वंगु म्येय् संजिप प्रधानया सः व अनिल तुलाधरया लय् व बाजं ग्वसाः दुसा थुगु म्ये अन्नपूर्ण स्टूडियाेस …. रेकर्ड यानादीगु खः । म्येया म्यूजिक भिडियाेया निर्देशन पवन जाेशीं यानादीगु खः । थुगु म्यूजिक भिडियाेय् च्वमि महर्जन व सपना डंगाेलया मू अभिनय खनेदु । म्यूजिक भिडियाेया छायांकन व सम्पादन साेहन मानन्धरं यानादीगु दु । म्येया काेरियाेग्राफ सुरज नापितं यानादीगु खःसा थुगु म्येय् मीरा डंगाेलं समाः याकादीगु खः । म्येय् सरस्वती मानन्धरया आलाप नं न्यने दइ ।
थथे हे छंगु मतिना म्येय ज्वःम्ये कथं दु । थुगु म्येय् सानु बाबु महर्जन व निशा देशारया सः न्यने दइ । लाेक लसय् दुगु थुगु म्ये न्हापा अडियाे ड्राइभ आरसी स्टूडियाेस श्याम महर्जनं रेकर्ड यानादीगु खःसा म्येया रिरिकर्डिङ भ्वाइस स्टूडियाेस दीप तुलाधरं रेकर्ड यानादीगु खः। म्येया म्यूजिक भिडियाेया निर्देशन पवन जाेशीं यानादीगु खः । थुगु म्यूजिक भिडियाेय् म्येच्वमि महर्जन व रूक्साना महर्जनया मू अभिनय खनेदु । म्यूजिक भिडियाेया छायांकन व सम्पादन साेहन मानन्धरं यानादीगु दु । थुगु म्यूजिक भिडियाेय् च्वमि महर्जनं सहनिर्देशकया ज्या नं यानादीगु खः ।
थथे हे मांया यःम्ह मचा म्येय् किशाेर कुमार शाही व सुद्ध लक्ष्मी श्रेष्ठया सः व अनिल तुलाधरया लय् व बाजं ग्वसाः दुसा थुगु म्ये अन्नपूर्ण स्टूडियाेस विजय मास्कीं रेकर्ड यानादीगु खः । म्येया म्यूजिक भिडियाेया निर्देशन च्वमि महर्जनं यानादीगु खः । थुगु म्यूजिक भिडियाेया छायांकन विजय सिंहं यानादीगु खःसा साेहन मानन्धरं सम्पादन यानादीगु दु । म्यूजिक भिडियाेय् नरेन्द्र डंगाेल, नानीमय्जु डंगाेल, निरज डंगाेल, अल्का डंगाेल, निजल डंगाेलं विशेष ग्वाहालि यानादीगु दु ।