नेपालभाषाया लोकंह्वाःगु म्ये `नाप च्वने मदुसां´या कभर म्येय् दयेकूगु म्यूजिक भिडियो थौं छगू ज्याझ्वःयासें पितब्वज्या याःगु दु ।
जुजुकाजी रंजितया मू सः दुगु व हरि बहादुर रंजितया च्वसा व लय् दुगु थुगु म्ये कोरोना इलय् `कं नं स्वां जुइ´ म्येय् जूगु म्येकासाय् न्हाप जुयादीम्ह राजीव योगल श्रेष्ठं कभर हालादीगु खः ।
पेजथ्री बाछिपौया सम्पादक दर्शनवीर शाक्यया परिकल्पना व निर्देशनय् दयेकूगु थुगु म्ये संकिपाय् किशोर चिपालु व रविना तुलाधरया मूभुमिका दु ।
मनोजरत्न शाहीया छायांकन व सम्पादनय् दयेकूगु म्येसंकिपाया छायांकन जर्सिङपौवाय् च्वंगु चैत्य रिसोर्टय् जूगु खः ।
जुगल डंगोलया संगीत संयोजनय् आर्टोम्यूज रेकर्डिङ स्टूडियोय् थुगु म्ये रेकर्ड जूगु खः ।
पूर्वमन्त्री शैलेन्द्र बव्राचार्यया विशेष उपस्थिति दुगु ज्याझ्वलय् मू म्ये हालामि जुजुकाजी रंजित, वरिष्ठ छाँयाकार राजभाइ सुवालपिसं म्ये संकिपायात कयाः नुगः खँ तयादीगु खः ।