लहना वाःपौयात प्रेस काउन्सिल नेपालया ५३ क्वःगु बार्षिकोत्सवया ज्याझ्वलय् लहना वाःपौयात भाषागत सिरपा लःल्हाःगु दु । राष्ट्रपति कार्यालय शीतल निवासय् जूगु ज्याझ्वलय् राष्ट्रपति रामचन्द्र पौडलया उपस्थितिइ लहना वाःपौया प्रकाशक व प्रधान सम्पादक नृपेन्द्रलाल श्रेष्ठयात सञ्चार व सूचना प्रबिधि मन्त्री पृथ्बी सुब्बा गुरुङ्गं हनापौ व प्रेस काउन्सिलया अध्यक्ष बालकृष्ण बस्नेतं नगद लःल्हानादीगु खः ।
लहना वाःपौ छगू दशक न्ह्यःनिसें पत्रिकाया माध्यमं भाषा, संस्कृति नापं नेवाः ब्यक्तित्व लिसे थीथी ख्यःयात मदिक्क प्रचार प्रसार याना वयाच्वंगुलि प्रेस काउन्सिलं भाषागत सिरपा लःल्हाःगु खः ।
अथेहे ज्याझ्वलय् काउन्सिलया पूर्व सदस्य–सचिव रघुराम विष्ट, अग्रज पत्रकारपि ज्ञान उदास, देवेन्द्र चुँडाल, केदारबाबु तिवारी, चित्राङग थापा, बलदेब अवस्थी, खगेन्द्र खत्री, हरिबिनोद अधिकारी, उषा लोहनी, खुर्शिद आलम, विष्णुप्रसाद सुवेदी, बोधराज त्रिपाठी, बालकुमार नेपाल, प्रमोदकुमार सिंह (दाहाल), ईश्वरी वाग्ले, जन्मदेव जैसी, ईश्वरीप्रसाद काफ्लेयात हंगु खः ।
उकथं हे प्रेस काउन्सिल गोपालदास पत्रकारिता सिरपा अखण्ड भण्डारी व नेपाल प्रेस इन्स्टिच्यूटयात लःल्हागु खः । प्रेस काउन्सिल सुरेन्द्रबहादुर बस्नेत पत्रकारिता सिरपा बद्री सिग्देल, प्रेस काउन्सिल आचारसंहिता सिरपा रातोपाटी डटकमयात लःल्हागु खः ।
By सुनिता महर्जन
वि.सं. २०६० सालय् मेट्राे एफएमय् सांस्कृतिक मण्डल ज्याझ्वः न्ह्याकाः औपचारिक रूपं सञ्चार ख्यलय् न्ह्यज्यानादीम्ह सुनिता महर्जनजु थ्वयां न्ह्यः नं सन्ध्याटाइम्स न्हिपतिइ इलय्ब्यलय् फिचर राइटिङ यानावयाच्वनादीम्ह खः । सांस्कृतिक मण्डल ज्याझ्वःया निंतिं समाचार संकलन, कार्यक्रम प्रस्ताेता व निर्माणया ज्या यानादीम्ह वय्कलं इलय्ब्यलय् अप्सरा वाःपाै, तिकिझ्याः वाःपाैलिसेंया नेपालभाषाया पत्रिकाय् च्वसु प्रकाशित यानादीगु दु । लिपांगु इलय् मेराे साप्ताहिक पत्रिकाय् प्रमुख संवाददाताकथं ज्या यानाच्वनादीगु दु । नेवाः संचार ख्यलय् मिसातय् उपस्थितियात सशक्त दय्के माः धइगु तातुनां वय्कःया हे पहलय् न्हाय्कं डटकम न्ह्याकादीगु दु । वय्कः थाैंकन्हय् नेवाः पत्रकार राष्ट्रिय दबूया केन्द्रीय ल्यूछ्याञ्जे जुयादी सा आदिवासी जनजाति पत्रकार महासंघ (फोनिज)या नं केन्द्रीय दुजः जुयादी ।