रेडियो प्रसार सेवा विकास समितिं (रेडियो नेपाल) महिला सहायता तथा स्तनपान कक्ष न्ह्याकुगु दु । मिसा कर्मचारीपिन्त लक्षित यानाः संविधान दिवस तथा राष्ट्रिय दिवस २०८१ या अवसरय् रेडियो नेपालं थगु केन्द्रीय कार्यालय सिंहदरबारय् स्तनपान तथा महिला सहायता कक्ष न्ह्याकुगु खः । उगु कक्षया वंगु आइतवाः छगु ज्याझ्वः यानाः समितिया अध्यक्ष नापं सूचना तथा सञ्चार मन्त्रालयया सचिव राधिका अर्यालं उलेज्या यानादिगु खः । उगु ज्याझ्वलय् नवासें सचिव अर्यालं रेडियो नेपालय् महिलामैत्री वातावरणया लागि याःगु प्रयासयात प्रशंसा यानादिल ।
अथेहे ज्याझ्वलय् नवासें रेडियो नेपालया कार्यकारी निर्देशक अमरध्वज लामां थुकिं रेडियो नेपालय् ज्याः यानाच्वंपिं मिसा कर्मचारीपिनिगु मनोबल थाहा वनिगु व मिसा कर्मचारीया नाप नापं इमि मस्तय्त नं ग्वाहालि जुइगु धैदिल । नापं वयकलं ज्याकुथि लैंगिक समानताया लागि थम्हं रेडियो नेपालया कार्यकारी निर्देशक जुयाबलय् यानाःगु बचं अनुसार सहायता कक्ष न्ह्याकागु धैदिल ।
अथेहे ज्याझ्वलय् नवासें रेडियो नेपाल दिदी बहिनी समूहया अध्यक्ष एवं उपनिर्देशक प्रज्ञा सरदं लंैगिक सशक्तीकरण व सामाजिक समावेशी अभियन्ताया रुपय् म्हसिउम्ह कार्यकारी निर्देशक लामां थगु पदवहाली ज्याझ्वलय् यानादिगु वचं थुलि याकनं पुवंगुलिं हर्ष व्यक्त यानादिल ।
By सुनिता महर्जन
वि.सं. २०६० सालय् मेट्राे एफएमय् सांस्कृतिक मण्डल ज्याझ्वः न्ह्याकाः औपचारिक रूपं सञ्चार ख्यलय् न्ह्यज्यानादीम्ह सुनिता महर्जनजु थ्वयां न्ह्यः नं सन्ध्याटाइम्स न्हिपतिइ इलय्ब्यलय् फिचर राइटिङ यानावयाच्वनादीम्ह खः । सांस्कृतिक मण्डल ज्याझ्वःया निंतिं समाचार संकलन, कार्यक्रम प्रस्ताेता व निर्माणया ज्या यानादीम्ह वय्कलं इलय्ब्यलय् अप्सरा वाःपाै, तिकिझ्याः वाःपाैलिसेंया नेपालभाषाया पत्रिकाय् च्वसु प्रकाशित यानादीगु दु । लिपांगु इलय् मेराे साप्ताहिक पत्रिकाय् प्रमुख संवाददाताकथं ज्या यानाच्वनादीगु दु । नेवाः संचार ख्यलय् मिसातय् उपस्थितियात सशक्त दय्के माः धइगु तातुनां वय्कःया हे पहलय् न्हाय्कं डटकम न्ह्याकादीगु दु । वय्कः थाैंकन्हय् नेवाः पत्रकार राष्ट्रिय दबूया केन्द्रीय ल्यूछ्याञ्जे जुयादी सा आदिवासी जनजाति पत्रकार महासंघ (फोनिज)या नं केन्द्रीय दुजः जुयादी ।