सार्क जर्नलिष्ट फाेरमं छगू विज्ञप्ति पितबिसें बंगलादेशया सञ्चारमाध्यमय् जूगु हःताःयात कयाः आपत्ति प्वंकूगु दु ।
फाेरमया नायः राजु लामा व मूछ्याञ्जे माे. अब्दुर रहमानं मंकाः ल्हाःचिं तयाः पिथंगु विज्ञप्तिइ बंगलादेशया नांजाःगु सञ्चारगृह इष्ट वेष्ट मिडिया ग्रूपय् जूगु हःतालं थःपिं स्तब्ध जूगु धयातःगु दु । उज्वःगु हःतालं सञ्चार क्षेत्रयात मर्माहत याःगु धासें फाेरमं बंगलादेशया अन्तरिम सरकारयात थुज्वःगु हःताः पनेगु निंतिं इनाप याःगु दु ।
सञ्चार माध्यम सुयां नं पक्ष वा विपक्ष मजुसें समाचार प्रसारण याइगु थाय् जूगुलिं थुकियात सुयां नं विपक्षीकथं काये मज्यूगु विज्ञप्तिइ न्ह्यथनातःगु दु ।
सोमवाः न्हिनय् बंगलादेशया राजधानी ढाकाया बसुन्धरा आवासीय क्षेत्रय् च्वंगु इडब्लुएमजीएल कम्प्लेक्सय् आक्रमण यानाः रेडियो क्यापिटलया ज्याकुथि व कलेर कान्थोया ज्याकुथिइ तोडफोड याःगु खः ।
आक्रमणकारीपिसं कम्प्लेक्स परिसरय् पार्किङ यानातःगु म्हाेतिं नं २० गः सवारी साधन तछ्याःगुलिं ईडब्लुएमजीएलया संचार गृहया पत्रकार व कर्मचारीया लिसें स्थानीय जनता ग्यानाच्वंगु दु । हःताःया झ्वलय् छम्ह मिसा पत्रकारयात दुर्व्यवहारतकं जूगु खः ।
सञ्चार माध्यमय् हःताः जुइवं बंगलादेशया पत्रकारत छधी जुयाः हःताः याःपिन्त ४८ घाै दुने ज्वनाः कारवाही यायेत मंगलवाः प्रदर्शन याःगु दु । इडब्लुएमजीएल बंगलादेशया नांजाःगु सञ्चार संस्था खः ।