बागमती प्रदेश सरकारं नेपालभाषा व तामाङ्ग भाषायात सरकारी कामकाजी भाषाकथं लागु यायेत दयेकूगु भाषा ऐन थनिंनिसें लागु जुइगु जूगु दु । थुगु लसता हनेगु निंतिं बागमती प्रदेश सरकारं थौंया दिंयात भाषा दिवसया रुपय् हनेगु निर्णय याःगु दु । थ्व हे झ्वलय् थौं बसन्तपुरय् छगू औपचारिक ज्याझ्वः न्ह्यानाच्वंगु दु ।
बागमती प्रदेशया मुख्यमन्त्री शालिक राम जम्कट्टेलया सभापतित्वय् जुयाच्वंगु ज्याझ्वलय् सम्माननीय प्रधानमन्त्री पुष्पकमल दाहाल प्रचण्डया मूपाहाँकथं झायादीत्यंगु दु ।
बागमती प्रदेश संस्कृति पर्यटन व सहकारी मन्त्री शैलेन्द्रमान बज्राचार्यया कजिसुइ थुगु ज्याझ्वः जुयाच्वंगु खः ।
ज्याझ्वलय् नेवाः देय् दबूया नायः पवित्र बज्राचार्य, नेपाल तामाङ्ग धेदुङ्गया नायः माेहन गाेले, लिसें थीथी नेवाः व तामाङ खलःपुचःया ब्वति दु । थाैं सुथय् ७ बजेनिसें न्ह्याःगु सांस्कृतिक र्याली येँया परम्परागत थाय्त चाहिउगु खः ।
ज्याझ्वलय् नेवाः देय् दबूया उपाध्यक्ष उमेश स्थापितं लसकुस यानादिसें थःपिनि सलंसः दँ न्ह्यःनिसेंया माग संघीयतां पूवंकेगुपाखे पलाः न्ह्याःगु लसताया दिं जूगु खँ तयादिल ।
ज्याझ्वलय् उपप्रधानलिसें अर्थमन्त्री वर्षमान पुन, युवा तथा खेलकुदमन्त्री विराजभक्त श्रेष्ठलिसेंया उपस्थिति दु ।