अन्तर्राष्ट्रिय मातृभाषा सम्मेलन जुइगु

मातृभाषा पत्रकारिता न्ह्यागु १०० दँ पुवंगु लसताय् मातृभाषा पत्रकारिता शताब्दी दँ हनेत्यंगु दु । थ्व झ्वलय् जेठया १९ व २० गते नेवाः पत्रकार राष्ट्रिय दबूया ग्वसालय् न्हापांगु अन्तराष्ट्रिय मातृभाषा पत्रकारिता सम्मेलन याइगु जुगु दु । थुगु सम्मेलनय् नेपाःलिसें भारत, बङगलादेश, पाकिस्तान, जापान, श्रीलङ्का व मेमेगु देय्या पत्रकारपिन्सं ब्वति काइगु जुगु दु । थौ यल लाय्कूया केशव नारायण चुकय् छगु पत्रकार सम्मेलन यानाः थुगु जानकारी व्यूगु खः ।
जेठ १९ गते शनिवा यलया स्टाफ कलेजय् पूर्वराष्ट्रपति विद्यादेवी भण्डारीं उलेज्या यानाः न्ह्याकिगु थुगु सम्मेलनय् मातृभाषाया थिथि विषय कयाः प्यानल डिस्कसन याइगु ज्याझ्वः दु । निन्हु यंक जुइगु थुगु ज्याझ्वः कन्हे खुनु थिमिइ क्वचाकिगु जुगु दु । नेपाः देय् व पिने च्वंपिं यानाः सयौं पत्रकारपिन्स ब्वति काइगु थुगु ज्याझ्वलय् यल व थिमि नगर पालिका नाप जाना पिने वपिं पत्रकारपिन्त हेरिटेज वाक याकिगु नं धागु दु ।
थुगु ज्याझ्वलय् धर्मादित्यया बारे लेख रचना दुगु बुलेटिन लिसें नेपाया पत्रकारिता ख्यलय् विशेष योगदान विउपिं व्यक्तित्वः पिनि किपा दुथ्याका क्यालेण्डर पिथनेगु प्रकाशन यायेगु ज्याझ्वःया कजिं लिसें दबूया न्वकु सुरेन्द्रभक्त श्रेष्ठं कनादिल ।
दच्छियंकं हनेत्यंंगु मातृभाषा शताब्दी दँया झ्वलय् धर्मादित्य धर्माचार्यया हुलाक टिकट पिथनेगु, वहःया पाय्म्वः पिथनेगुलिसें मातृभाषा पत्रकारिता व धर्मादित्यया योगदानयात पिब्वइकथंया थीथी ज्याझ्वः न्ह्याकेगु ग्वसाः दुगु दबूया नायः नृपेन्द्रलाल श्रेष्ठं कनादिल ।
ज्याझ्वःया विविध पक्षयात कयाः वरिष्ठ न्वकु सुनिल महर्जनं नुगःखँ तयादीगु खःसा अन्तर्राष्ट्रिय ब्वतिया निंतिं सार्क जर्नालिष्ट फोरम व नेपाःया मातृभाषी पत्रकारपिनि ब्वतिया निंतिं नेपाल आदिवासी जनजाति पत्रकार महासंघ (फोनिजं)लिसे सहकार्य जुयाच्वंगु दु ।
पत्रकार सम्मेलनय् विदेशं सम्मेलनय् ब्वति कयादीपिनिबारे सार्क जर्नलिष्ट फोरमया नायः राजु लामां जानकारी बियादीगु खः ।
दबूया छ्याञ्जेलिसे प्रचार कजि राजु नापितं न्ह्याकूगु ज्याझ्वलय् संस्थापक नायः श्रीकृष्ण महर्जन व निवर्तमान नायः सुरजवीर बज्राचार्यया नं ब्वति दुगु खः ।