बागमति प्रदेश संस्कृति पर्यटन व सहकारी मन्त्रालय्पाखें नेवाः भाय् व तामाङ्ग भाय् कामकाजी भाय् जुइगु लसता ज्याझ्वः याइगु जूगु दु ।
थौं यलया हिमालयन होटलय् छगू पत्रकार सम्मेलन यासें पूर्व मन्त्रि लिसें बागमति प्रदेससभा दुजः पुकार महर्जनं पारित जुइधुंकुगु भाषा विधयेक माल धासा लिपा संशोधन जुइ फु । थ्व भाषा विधेयक जिपिं दत्तले जक मखु जिपिं धुंका वइपिं मेपिं मन्त्रितयसं नं कार्यान्वयन याकेगु तःधंगु खः धयादिल ।
थः प्रदेशमन्त्री जूगु इलय् प्रस्ताव तयागु व थ्व कार्यान्वयन जुइत्यंगु लसताया खँ जूगु नं धयादिल । अथेहे बागमति प्रदेशया संस्कृति, पर्यटन व सहकारी मन्त्री शैलेन्द्र मान बज्राचार्यं थ सांसद जुया च्वनाबलय् हाउसय् पटक पटक खँ ल्ह्वनागु व आ वया दक्व पार्टीं थःपिन्त समर्थन याःबलय् थ्व विधेयक पारित यायेत अपुगु खः । मन्त्रालयस नेवाः व तामाङ्ग भाय् सःपिं म्हो जक दुगुलिं थःपिन्सं कर्मचारी नापं मिले जुयाः थपिनिगु भाषं च्वयागु पत्रयात कार्यान्वयन याकेत ग्वाहालि यानादीत नं इनाप यानादिल । नापं २४ गतेया ज्याझ्वः सुथांलाकेत सकल पत्रकारपिन्सं थःथःगु थासं प्रचारप्रसार यायेत नं इनाप यानादिल ।
नेवाः देय् दबूया नायः पवित्र बज्राचार्यं लसकुस न्वचु तयादिगु खःसा नेपाल तामाङ्ग घेडुङ्गया न्वकु सन्जु ब्लोनं सुभाय् न्वचु तयादिगु खःसा पत्रकार सम्मेलनय् प्रेस वक्तव्य बागमति प्रदेशया सचिव धु्रब गैडां ब्वनाः न्यंकादीगु खः ।
