बागमती प्रदेशं थ्वहे बैशाख २४ गते बागमती प्रदेशन्यंक सार्वजनिक विदा बीगु निर्णय याःगु दु । प्रदेश सरकारया बिहीवाःया मुँज्याया क्वःछिनाकथं प्रदेश सरकारं कामकाजी भाषा ऐन २०८० कार्यान्वयन थ्वहे बैशाख २४ गते सोमबारनिसें यायेत्यंगुलिं उखुन्हु विदा बीगु क्वःछ्यूगु खः ।
उगु क्वःछिना कार्यान्वयन याइगु दिं बागमती प्रदेशं दिवसकथं हनेगु क्वःछिउगुलिसें थुकिया लसताय् येँया बसन्तपुरय् “बागमती प्रदेश सरकारी कामकाजी भाषा ऐन २०८० शुभारम्भ घोषणा समारोह” ग्वसाःग्वये त्यंगु दु ।
बागमती प्रदेश संस्कृती पर्यटन तथा सहकारी मन्त्री शैलेन्द्र बज्राचार्यया कजिसुइ “बागमती प्रदेश सरकारी कामकाजी भाषा ऐन २०८० शुभारम्भ घोषणा मुल समारोह समिती” स्वनाः बसन्तपुर डबलीइ उगु घोषणा समारोह ज्याझ्वः न्ह्याकेत्यंगु नेवाः देय् दबूया नायः पवित्र बज्राचार्यं कनादीगु दु ।
उगु ज्याझ्वःया निंतिं मुल आयोजक समारोह समिती, सचिवालयलिसें थीथी समिति, उपसमिति स्वनाः ज्या न्ह्याकेगु तयारी जुयाच्वंगुलिं वहे कथं न्ह्यानाच्वनागु नं नायः बज्राचार्यं कनादीगु दु ।
थुकिया बारे नेवाः देय् दबू स्वनिगः विशेष प्रदेशया न्वकु उमेश स्थापितं ज्याझ्वः तःजिक क्वचायेकेत नेवाः देय् दबू व नेपाल तामाङ घेदुङ संघया केन्द्रिय दुजःपिं, थीथी खलपुचः जातीपुचः व संघ–संस्थाया प्रतिनिधिपिसं मुल आयोजक समारोह समिति दयेकेगु व उगु समिति दुनें सचिवालय दयेकाः सचिवालयया दुजःपिनि संयोजकत्वय् थीथी समिति उपसमितित स्वनेगु तयारी जुयाच्वंगु कनादिल ।
बैशाख २४ गते सोमबाः सुथसिया ७ ता इलय् र्याली न्ह्याकीगु जूगुलिं नेवाः देय् दबू व तामाङ घेदुङ संघलिसे आवद्ध सकल संघ–संस्था व प्रतिनिधी लिसें शुभचिन्तक नेपाःमिपिन्त र्यालीइ ब्वति कायेत सुथसिया ६ः३० बजे थःथःगु जातिय स्थानिय बाजागाजा व भेषभूषाय् ब्वति कायेत न्वकु स्थापितं इनाप यानादीगु दु ।
छुं दिं न्ह्यःजक नेवाः देय् दबू स्वनिगः विशेष प्रदेश, बागमती प्रदेश व तामाङ घेदुङ संघया बागमति प्रदेशं बैशाख २४ गतेया दिं विदा बीमाःगुलिसें थुगु न्हियात दिवसकथं हनेमाःगु माग यासें मंकाः विज्ञप्ति पितबिसें इनाप याःगु खः ।