थ्वयां न्ह्यः चैत १२ गते अन क्रियाशील स्वंगुलिं संगठनं सुवेदीया राजीनामा फ्वसें स्वन्हुया अल्टिमेटम ब्यूगु खः । उगु ई दुने सुवेदीं राजीनामा मबीवं चैत १६ गतेनिसें कर्मचारीत संघर्षषय् कुहाँ वःगु खः ।
स्वंगू कर्मचारी संगठनया नेतृत्वय् संस्थानया कर्मचारीपिसं चैत १६ गतेनिसें लगातार सुथसिया १० बजेनिसें ११ बजेतक संस्थानया मूल गेटय् धर्ना बियावयाच्वंगु दु । थाैंनिसें धाःसा आन्दोलनया स्वरूप हिलाः कार्यकारी अध्यक्षयात प्रवेश हे निषेध याये त्यनागु गोरखापत्र संस्थानया आधिकारिक ट्रेड युनियन नेपाल राष्ट्रिय कर्मचारी संगठन–२०६३ या नायः विष्णुप्रसाद खनालं कनादीगु दु ।
संस्थान नेतृत्वय्र असफल जूगुलिसें राजनीतिक इमानदारितातकं मक्यंगुलिं सुवेदीया राजीनामायात ‘बटमलाइन’ दयेकाः थःपिं संघर्षय् कुहाँ वयागु खनालं कनादिल । ताःहाकःगु इतिहास दुगु गोरखापत्रय् सुवेदीं भ्रष्टाचार व अनियमितताया कीर्तिमान दयेकूगु व थ्व हे हुनिं छुं ला दुने हे थ्व संस्था तालं ग्वये मालीगु कथं संकटग्रस्त अवस्थाय् थ्यंगु खनालया दाबी दु । वय्कःया कथं, सुवेदीं याःगु भ्रष्टाचारय् अख्तियार दुरूपयोग अनुसन्धान आयोग व सतर्कता केन्द्रलिसेंया थासय् उजुरी लाःगु दु ।
‘संस्थानय् भ्रष्टाचार व अनियमितता अप्वयेकूम्ह सुवेदी नेतृत्वय् पूर्णतः असफल जूगुलिं थ्व हे चैत १२ गते राजीनामाया निंतिं स्वन्हुयाअल्टिमेटम बियागु खः,’ वय्कलं धयादिल, ‘उगु समयसीमा उल्लंघन याःगुलिं धर्ना, प्रवेश निषेधलिसेंया ज्याझ्वलय् कुहाँ वयागु खः ।’
गोरखापत्र संस्थानया कार्यकारी अध्यक्षय् सरकारं नियुक्ति यानाः छ्वइगु व उज्वःम्ह मनुखं ई ल्यं दुसां थःत सिफारिस यानाः छ्वःगु दल सरकारं पिहाँ वनेवं राजीनामा बियाः लँ चायेका बीमाःगु परम्परा दु । तर ०७८ असोजय् शेरबहादुर देउवा नेतृत्वया सरकारं नियुक्त यानाः गोरखापत्रया नेतृत्व कःघाःम्ह सुवेदीं उगु दल प्रतिपक्ष भूमिकाय् थ्यंसां राजीनामा ब्यूगु मदु । थ्वयां न्ह्यः ०७९ पुसय् माओवादी–एमाले गठबन्धनया सरकार गठन जूबलय् नं सुवेदीयात राजीनामा बीत तीव्र दबाब ब्यूगु खः । तर उकिया निला लिपा हाकनं माओवादी युटर्न जुयाः कांग्रेसलिसे सहकार्य याः वयेवं वय्कःयात राहत जूगु खः । १२३ दँ ताःहाकःगु इतिहास दुगु गोरखापत्र दैनिकय् कार्यकारी अध्यक्षया राजीनामा फ्वसें न्हापांखुसी कर्मचारी आन्दोलित जूगु खः ।