आदिवासी जनजाति उत्थान राष्ट्रिय प्रतिष्ठानं दँय्दसं बियावयाच्वंगु मातृभाषा राष्ट्रिय सेवा पुरस्कार थुगुसि जनकवि दुर्गालाल श्रेष्ठयात ल:ल्हाइगु जूगु दु ।
अन्तर्राष्ट्रिय मातृभाषा दिवसया लसताय् थ्वहे वइगु फागुन ९ गते वय्क:यात थुगु पुरस्कार ल:ल्हाइगु प्रतिष्ठानं छगु विज्ञप्ति पितबिया: जानकारी बिउगु दु । नेपाल भाषाय् घा जुया जक ख्वइगु ख: जि, होलिया मेला, माया रे रत्न थे जागु लोकंह्वागु मेया सर्जक वय्क:या मे याना: न्हून्हूपिं गायक गायिका उत्पादन याय्त तालागु दु ।
वय्कयात छगु ज्याझ्व: दथुइ संघीय मामिला तथा सामान्य प्रशासन मन्त्री अनिता देवी पाखें छगु लख नगद सहित पुरस्कार ल:ल्हाइगुु जानकारी वगु दु । वय्कलं नेपाली साहित्यया नापं नेपाल भाषाया साहित्य उत्थान व विकासय् अतुलनीय योगदानयागु उच्च मूल्याङ्कन यासें उगु पुरस्कार बिइ त्यंगु ख: । थ्व पुरस्कार थ्व सिवे न्ह्य: साहित्यकार तिलक विक्रम नेम्वाङ व वाङ्गमय शताब्दी पुरुष संस्कृतिविद् डा. सत्यमोहन जोशीयात ल:ल्हाय् धुंकुगु दु ।