पाकिस्तानया पूर्व प्रधानमन्त्री इमरान खानयात ज्वनेवं न्ह्याःगु विराेध प्रदर्शन हिंसात्मक जुजुं वनाच्वंगु दु । खानया समर्थक व प्रहरीपिनि दथुइ थाय् थासय् ल्वापु जुयाच्वंगु दु ।
इस्लामावादय् प्रदर्शनं उग्र रूप काःगु दु । ल्वापुया झ्वलय् छम्हेसिया ज्यान वंगु व ४० म्ह स्वयां अप्वः घाःपाः जूगु बीबीसीं धाःगु दु ।
ल्वापु तच्वयेवं पाकिस्तान न्यंकं मोबाइल सेवा दिकाबिउगु दु । पूर्व प्रधानमन्त्री खानयात म्हिगः इस्लामावादय् अदालत लावां ज्वंगु खः ।
भ्रष्टाचारसम्बन्धी द्वपनय् मुद्दाया निंतिं अदालतय् वंम्ह खानयात प्रहरीं ज्वंगु खः । पूर्व प्रधानमन्त्री खानविरुद्ध मेमेगु यक्व मुद्दा न्ह्यानाच्वंगु दु ।
तर, थःत बियातःगु फुक्क द्वपं राजनीतिक रूपं प्रेरित जूगु धासें पूर्व प्रधानमन्त्री खानं उकियात अस्वीकार याना वयाच्वंगु दु । वय्कःया समर्थकपिसं थाैं देय्न्यंकं प्रदर्शनया इनाप याःगु दु ।