नेपाल पत्रकार महासंघ प्रतिष्ठान प्रदेशया ग्वसालय् थौं यायेगु धयातःगु ‘अग्र अनुहार’ विमोचन नेवाः पत्रकार राष्ट्रिय दबू व आदिवासी जनजाति पत्रकार महासंघ (फोनिजं) विरोध यायेवं दिकेमाःगु स्थिति ब्वलंगु दु ।
येँया प्रदर्शनीमार्गय् च्वंगु पर्यटन बोर्डय् छगू ज्याझ्वः ग्वसाः ग्वसें महासंघपाखें ‘कथा अग्रजको गाथा महासंघको” धइगु नारा तयाः सफू पितब्वज्या यायेत्यंगु खः ।
थुगु सफू पिदनीगु सीवं दबू व फोनिजं महासंघया प्रतिष्ठान प्रदेशलिसे समन्वय यानाः नेपाल पत्रकार महासंघया संस्थापक नायः सत्यनारायण बहादुर श्रेष्ठयात नं कःघानाः जक सफू पिथनेत इनाप याःगु खः । थुकिया निंतिं तारन्ताः मुँज्या च्वनाः इनाप याःसां महासंघं थःपिनि विधानकथं धासें ‘अग्र अनुहार’ सफू विमोचन याये त्यँसेंलि फोनिज व दबूपाखें मञ्च घेरे यानाः ज्याझ्वः दिके ब्यूगु खः ।
सफू विमोचनय् पंगः थनेवं ज्याझ्वः स्थगित जूगु खःसा फोनिजया महासचिव मिलन लिम्बुं नेपाल पत्रकार महासंघया हेपाहा प्रवृत्तिविरुद्ध थःपिं थुकथं न्ह्याः वयेमाःगु खँ मञ्चय् च्वनाः हे धयादीगु खः । नेपाल पत्रकार महासंघया थःपिं नं दुजः खःगु व संस्थाया अग्रजपिनिप्रति थःपिनि नं सम्मान दु तर महासंघया संस्थापक नायः सत्यनारायण बहादुर श्रेष्ठया नां गनं हे उल्लेख मयासे वय्कःया योगदानयात कःमघासे पिथंगु सफू इतिहास जुइफइमखु, उकिं थःपिसं थुगु सफू विमोचन याके बी मखु धकाः पंगः थंगु खः ।
महासंघया प्रतिष्ठान प्रदेशपाखें ग्वसाःग्वःगु ज्याझ्वलय् मूपाहाँकथं सभामुख देवराज घिमिरे व विशेष पाहाँकथं सञ्चार तथा सूचनाप्रविधि मन्त्री रेखा शर्मायात ब्वनातःगु खः । तर ज्याझ्वलय् विरोध जुइगु सुचं वय्कःपिन्थाय् थ्यनेवं वय्कःपिं निम्हं हे ज्याझ्वलय् झायामदी । मूपाहाँ व विशेष पाहाँ निम्हं ज्याझ्वलय् मथ्यनीगु जुइवं अन दुपिं पूर्व अध्यक्षपिनिपाखें सुफू विमोचन याकेगु उद्घोष जुइवं फोनिज व दबूया दुजःपिसं मञ्च घेराउ यानाः विमोचनयात पनाब्यूगु खः ।
विमोचन ज्याझ्वः पने धुंकाः सञ्चारकःमिपिनिलिसे खँल्हासे नेवाः पत्रकार राष्ट्रिय दबूया मूछ्याञ्जे केके मानन्धरं थःपिसं डा. महेन्द्र विष्ट अध्यक्ष जुयाच्वनादीगु इलय् हे नेपाल पत्रकार महासंघया संस्थापक नायःया खँ मिले मजूगु व थुकियात भिंकाः वनेमाःगु माग यानाः ज्ञापन पौतकं बियागु तर उकियात थौंतक नं बेवास्ता याःगु हुनिं हे थौं थुकथं विरोध जूगु खः धयादिल । वय्कलं सफू तयार यानाच्वंगु इलय् नं थःपिसं सत्यनारायण बहादुरयात नं दुथ्याकेत व थप अध्ययन यायेमाःसा ग्वाहालि यायेत तयार दु धाःसां महासंघं हेपाहा प्रवृत्ति क्यनाः सफू पिथनेगु कुतः याःगु व थुकिया विरुद्ध आः थःपिं निरन्तर संघर्ष न्ह्याकावं च्वनेगु धयादीगु दु ।
थ्वहे झ्वलय् फाेनिजया नायः गजुरधन राइ नं थःपिसं थुगु ज्याझ्वः मयायेत इनाप यानागु व जुल धाःसा थःपिं संघर्षय् वये माली धकाः धयागु जूसां नं महासंघं गुकथंया ज्या यात उकी थःपिनि असहमति दुगु व तत्काल थुगु पलाःयात भिंकेत इनाप यानादिल ।
किशोर नेपालया गैरजिम्मेवार अभिव्यक्ति
ज्याझ्वलय् ब्वति कयादीपिं पूर्व अध्यक्ष मध्ये किशोर नेपालं थःपिनि नुगःखँ तयेगु झ्वलय् २००८ सालय् थःपिं बूगु व २०१२ सालय् नकतिनि प्यदँ दुम्ह जूगुलिं उबलेया खँ मस्यू धकाः गैरजिम्मेवारपूर्ण अभिव्यक्ति बियादीगु खः । महासंघया नेतृत्व यानादीम्ह वय्कलं थःगु संस्थाया इतिहास मस्यूगु खःसा सीकेगु कुतः याय्माःगु खः । तर नेपाली पत्रकारिता ख्यलं हे हनातःम्ह किशोर नेपालं ब्यूगु थुगु अभिव्यक्तिं वय्कःया चरित्रयात उजागर यानाब्यूगु दु ।
मिसा पत्रकारपिनि नं असन्तुष्टी
नेपाल पत्रकार महासंघया अग्र अनुहार सफुतिइ सुं नं मिसा दुमथ्याःगु खँयात कयाः मिसा पत्रकारपिसं असन्तुष्टी प्वंकूगु दु । ज्याझ्वलय् नुगःखँ तयादीपिं मिसा पत्रकारपिं मध्ये प्रेस यूनियनया न्वकु सलोजा दाहालं सत्यनारायण बहादुर श्रेष्ठया खँ उलिमछि न्ह्यःनिसें विवाद जुयाच्वंसां थौतक नं मज्यंगु दुःखया खँ खः धयादिल । वय्कलं थुगु सफू पत्रकार महासंघया नायःपिनि योगदानयात कयाः च्वयातःगु जूगुलिं थुकी मिसात द्ुमथ्याःगु व लिपा थुकी दुथ्याइकथं आगामी नेतृत्व मिसा हयेमाःगु खँय् बः बियादिल ।
थथे हे न्यूनतम पारिश्रमिक निर्धारण समितिया नायः संगीता खड्कां नंं सफुतिइ मिसात दुमथ्याःगु व सत्यनारायणया नां मदुगु खँय् असन्तुष्टी प्वंकादिल । वय्कलं मिसात नेतृत्वय् मथ्यंसां नं नेपाःया पत्रकारिता इतिहासय् मिसा पत्रकारपिनि छुं हे भूमिका मदुगु मखुगु जूगुलिं मिसा पत्रकारपिनि खँ नं थन उल्लेख जुइमाः धयादीगु खः ।