वइगु असोज १९ व २० गते जुइगु ललितपुर उद्योग वाणिज्य संघया ४४ क्वःगु दँमुँज्या व तःमुँज्याया झ्वलय् नायः पदया लागि मूछ्याञ्जे रुपकमान महर्जनं उम्मेदवारी दर्ता याकादीगु दु । वंगु झिदँ न्ह्यःनिसें थीथी पदय् च्वनाः संघय् ज्या यानादीम्ह वय्कलं यल जिल्लायात उद्योग वाणिज्यया ख्यलय् न्ह्यज्याकेगु निंतिं हे थःपिसं उम्मेदवारी बियागु धयादीगु दु ।
मूछ्याञ्जे रुपकमान महर्जनं थःगु प्यानललिसेंया उम्मेदवारी सम्बन्धय् जानकारी बीगु निंतिं असोज ४ गते बिहीवार यल दरवारय् छगू पत्रकार सम्मेलनया ग्वसाः ग्वःगु खः ।
तःमुँज्याय् महर्जनलिसें नायः पदया निंतिं रवीन्द्र राज ताम्राकार व विश्व राज बज्राचार्यया नं उम्मेदवारी दु ।
रुपकया प्यानलं वरिष्ठ न्वकू पदय् सुसन महर्जन, उद्योग न्वकू सुरज बज्राचार्य, वाणिज्य न्वकू सुनिल शाक्य, संस्थागत न्वकू रमेश सिंह महर्जन, मूछ्याञ्जे महेश श्रेष्ठ व दांभरिं राजु महर्जनं उम्मेदवारी ब्यूगु दु ।
थथेहे उद्योगपाखेया दुजलय् अनिल महर्जन, आशिष शाक्य, गुण केशरी ताम्राकार, संघ रत्न डंगोल, सबुता महर्जन व सदिक्षा डंगोलया अले वाणिज्यपाखे प्रेमकाजी शाक्य, विक्रम बज्राचार्य, महेश्वर लाल खोसीं, राजेन्द्र लामा तामाङ, लक्ष्मी कृष्ण श्रेष्ठ, सुनिल कुमार श्रेष्ठ व सुरज महर्जनं दुजः पदय् उम्मेदवारी ब्यूगु दु ।
थथे हे संस्थागतपाखेया दुजलय् नेपाल कपडा तथा सिलाई व्यवसायी संघ ललितपुरया पूर्ण महर्जनया उम्मेदवारी दु सा एसोसिएटपाखे यल दरवारया रवि महर्जन निर्विरोध निर्वाचित जुयादीगु दु ।