नेवाः न्ह्यलुवालिसें पूर्वस्वास्थ्य राज्यमन्त्री तीर्थराम डंगोल थःगु उपचारलिपा म्हिगः थःगु हे छेँय् लिहाँ झायादीगु दु । वंगु सोमवाः स्वास्थ्यय् सामान्य समस्या खनेदयेवं वासः याकेत अस्पताल झाःम्ह वय्कः डाक्टरया सुझावकथं अस्पतालय् हे च्वनाः आराम यानादीगु खः ।
प्यन्हु अस्पतालय् च्वने धुंकाः वय्कःया स्वास्थ्यय् बांलाःगु लिच्वः खनेदयेवं वय्कःयात म्हिगः अस्पतालं डिस्चार्ज याःगु खः ।
वय्कःया उपचारलिपा आराम याये मगाःगु हुनिं स्वास्थ्यय् समस्या खनेदुगु डाक्टरपिनि धापु दु । वय्कःयात म्होतिं नं निवाः पूर्ण आराम यायेत डाक्टरपिसं सुझाव ब्यूगु जूगुलिं भिंचितामि व थःथितिपिन्त म्होतिं नं निवाःतक फोन स्वापू वा छेँय् नाप लाः मझायेत छेँजःपिसं इनाप यानादीगु दु ।
वय्कःया उसाँय् मदुगु बुखँ सञ्चार माध्यमय् वयेवं यक्वसिनं फोन यानाः व छेँय् वयाः नाप लाः वयेगु याःगुलिं वय्कःयात आराम मगाःगु व निरन्तर खँल्हाबल्हा यानादीबलय् स्वास्थ्यय् समस्या ब्वलंगु चिकित्सकपिनि धापु दु ।
प्यलाति न्ह्यः वय्कःया प्राेस्ट्रेटया क्यान्सरया उपचार जूगु खः । अनंलिपा छेँय् हे अाराम यानाच्वनादीम्ह नेवाः न्ह्यलुवा डंगाेलयात यक्व हे भिंचितामिपिसं छेँय् हे वनाः नाप लाः झाःगु खः ।
वय्कःया उसाँय् याकनं भिनेमा धकाः न्हाय्कं डटकम पुचलं मनंतुनाच्वना ।