गणेशदेवी मानन्धर स्मृति प्रतिष्ठानया ग्वसालय् नेपालभाषा ख्यलय् याेगदान यानाच्वंपिं स्वम्ह व्यक्तित्वपिन्त छगू ज्याझ्वःया दथुइ शनिवाः इनेज्या याःगु दु । थथे हनेज्या याःगु ज्याझ्वलय् जन गायक भृगुराम श्रेष्ठ, वरिष्ठ सिनेपत्रकार बिजयरत्न असंबरे व न्हूगु प्रतिभा कथं म्येहालामि सिद्धार्थ बज्राचार्ययात छगू समाराेह दथुइ तःजिक सम्मान एवं सिरपा शनिवार मरूहिति ब्यांक्वेटय् लःल्हात । प्रतिष्ठानया नायः बिजय कुमार मानन्धरया सभानायःसुइ न्ह्याःगु ज्याझ्वलय् बागमति प्रदेशया सभासद माननीय शैलेन्द्रमान बज्राचार्य, नेवाः देय् दबूया नायः पवित्र बज्राचार्य पाहां कथं व वरिष्ठ शिक्षाविद् हितकर वीर सिंह कंसाकार मू पाहांकथं झायादीगु खः ।
ज्याझ्वलय् सिद्धार्थ बज्राचार्ययात हनापाै लिसें न्याद्वः तकाया प्रतिभा सिरपा, बिजयरत्न असंबरेयात हनापाैलिसें झिंन्याद्वः तकाया नेपालभाषा पत्रकारिता सिरपा व जनगायक भृगुराम श्रेष्ठयात हनापाै लिसें निंन्याद्वः तकाया दीर्घ सम्मान लःल्हाःगु खः ।
दिवंगत गणेश देवि मानन्धर – येँ महानगरपालिका १३ वडाया समाजसेवी दिलबहादुर मानन्धरया जहान खःसा वय्कःया काय्पिं प्रा. डा. राजु मानन्धर (अस्ट्रेलिया), राजेश मानन्धर व सज्जु मानन्धर खः । दिवंगत् गणेशदेवी मानन्धरया लुन्तिइ वय्कःया परिवारपाखें गणेश देवी मानन्धर स्मृती प्रतिष्ठान गठन याःगु खः ।
प्रतिष्ठानया ज्यासना पुचलं सिरपा या निंतिं परामर्श समिति नं गठन याःगु खः। निर्देशक, च्वमिलिसें कलाकार पवन जोशीया कजिसुइ गठन जूगु परामर्श समितिइ खःसा लिउ कजि वरिष्ठ कलाकार नगिना जोशी, दुजः संगीतकार सुरेन्द्र श्रेष्ठ, म्येहालामि निशा देशार व पेजथ्री बाःछिपौया सम्पादक दर्शनवीर शाक्ययात नं मतिनाया चिं लःल्हाःगु खः ।
अथेहे सांगीतिक ज्याझ्वनं जूगु उगु ज्याझ्वलय् जनगायक भृगुराम श्रेष्ठं नं छपू म्ये न्ह्यब्वयादीगु खःसा वरिष्ठ म्ये हालामि जुजुकाजी रंजित, निशा देशार व सज्जु मानन्धर,षा नापनापं सिरपा कयाःदिम्ह सिद्धार्थ बज्राचार्य व आपालं कलाकारपिन्सं नं सांगितिक प्रस्तुति न्ह्यब्वयाः दिगु खः । उगु हे ज्याझ्वलय् संगीतकःमि सुरेन्द्र श्रेष्ठ , सबिना मानन्धर, सुरेश मानन्धर , राजेन्द्र डंगोल व पुचः पाखें जनगायक भृगुराम श्रेष्ठयात विशेष सांगितिक देछाः न्ह्यब्वःगु खः ।