सिटी एक्सप्रेस मनी ट्रान्सफर व भक्तराज आचार्य संगीत प्रतिष्ठानया मंकाः ग्वसालय् ‘भक्तराज आचार्य राष्ट्रिय संगीत सम्मान २०७९’ निम्ह नेवाः संगीत साधकपिन्त लःल्हाःगु दु ।
उगु सम्मानय् गायनपाखे वरिष्ठ गायक व संगीतकार दीप श्रेष्ठ व संगीतपाखे वरिष्ठ संगीतकार शक्ति बल्लभ श्रेष्ठयात म्हतिं ५० द्वः व छतका ध्यबालिसें सिरपाः लःल्हाःगु खः ।
उगु हे ज्याझ्वलय् ‘सुशीला आचार्य सु–स्वास्थ्य कामना सम्मान’ युवा तबला बादक बिपी सिंहयात लःल्हाःगु दु। २५ द्वः तकाया थुगु सम्मान सांगीतिक क्षेत्रय्र कृयाशील स्वास्थ्योपचार याकाच्वंपिं संगीतकःमियात वंगु दँनिसें लःल्हायेगु न्ह्याकूगु खः ।
भक्तराज आचार्य संगीत प्रतिष्ठानया संरक्षक गायक लिसें संगीतकार भजन शिरोमणि भक्तराज आचार्य, प्रतिष्ठानया नायः सुशिला आचार्य व सिटी एक्सप्रेस मनी ट्रान्सफरया प्रबन्ध निर्देशक चन्द्र टण्डनं मंकाःकथं उगु हना लःल्हाःगु खः ।
भक्तराज आचार्य संगीत प्रतिष्ठानं छुं दँ न्ह्यःनिसें संगीत व कलाया ख्यलय् महत्त्वपुर्ण योगदान बियावयाच्वंगु व सिटी एक्सप्रेसं सामाजिक उत्तरदायित्व अन्तर्गत भक्तराज आचार्य संगीत प्रतिष्ठानयात साथ बिया वयाच्वंगु दु ।