नेवाः संगीतख्यलय् आः याकनं हे छगू तःजिगु संगीत सिरपा ज्याझ्वः जुइगु जूगु दु । संगीतख्यलय् थीथी गतिविधि न्ह्याकावया च्वंगु नेवाः साधना कला केन्द्रया ग्वसालय् थथे तःजिगु सिरपाया ग्वसाः जुइत्यंगु खँयात कयाः शनिबाः छगू पत्रकार सम्मेलन जूगु दु ।
पत्रकार सम्मेलनय् जानकारी बिउकथं नेवाः संगीतख्यःयात कःघानाः जुइगु थ्व सिरपा ज्याझ्वलय् म्युजिक भिडियोत नं ब्वति कायेदःसां सिरपा धाःसा सांगितिक पक्षयात जक बिइगु खँ ग्वसाखलकं जानकारी बिल । ज्याझ्वलय् मिजं म्येहालामि, मिसा म्येहालामि, म्ये च्वमि , लय् चिनामि व बाजं ग्वसामि नापं याना मुकं न्यागु विधाय् सिरपा देछाइगु खँ दु ।
नेवाः साधना कला केन्द्रया नायः सुन्दर श्रेष्ठ बागमति भाइ भाजुं लसकुस न्वचु तयाः न्ह्याकुगु पत्रकार सम्मेलनय् सिरपा ग्वसाः या जानकारी बिसे पौभा सायमिं कनादीकथं थौंकन्हे न्हून्हूगु म्ये म्युजिक भिडियोया माध्यमं पिदनिगु जुया च्वंगुलिं सिरपा ज्याझ्वलय् ब्वति कायेया निंतिं अज्यागु भिडियो दुथ्याके फइगु तर अजागु भिडियोया प्राविधिक पक्ष व अभिनय पक्ष मखसे सांगितिक पक्षयात जक कुलाः मुल्यांकन यानाः सिरपा बिइगु खँ दु ।
पत्रकार सम्मेलनय् लोकंह्वाम्ह म्येहालामि पवित्र कसाः, संकिपाख्यःया न्ह्यलुवा पत्रकार विजयरत्न असंबरेया नापनापं अमरराज शर्मा राजोपाध्याय व जुजुकाजि रन्जित थेंज्यापिं नांजापिं संगीतकःमिपिनिगु नं विशेष उपस्थिति दूगु खः ।