म्यान्मारया कलाकारत दुथ्यागु मछाः मछाः या म्युजिक भिडियो पिहाँवःगु दु । न्हापा बर्मा धका धयातःगु म्यानमार देशय् आपालं नेपाली मूलया मनू च्वना वया च्वंगु दु । वहे म्यानमारं वया नेवाः म्येया म्युजिक भिडियोस मू भुमिका म्हिता प्याखं हुलाक्यंम्ह अम्बिका मगर व नेवाः म्युजिक भिडियो ख्यलय् तसकं लोकंह्वाम्ह अनुज शाक्यं नं थुके मूभुमिका म्हितातःगु दु ।
पुर्णकाजि ज्यापुया च्वसां पिदंगु थ्व म्ये सुमन मानन्धरं हालादीगु खः । जुगल डंगाेलं लय् चिना व संगीत संयाेजन नं यानादीगु थ्व भिडियो यात थौंकन्हे दकले सकले ल्हा ज्वम्ह धका धयातःम्ह साेहन मानन्धरं छायाँकन व सम्पादन यानादीगु खःसा समाःया ज्या सनम कुमार श्रेष्ठं यानादीगु खः ।
तिनतिकः महाबिकः व जातः नांयागु नेवाः फिल्म निर्माण यानादीम्ह दिपक कपालिया न्हापांगु निर्देशन कथं पिदंगु थ्व म्ये लुँमधि अजिमा प्रोडक्शन व थाइलाएण्डया कल्चरल एक्सेप्लोर जाना दयेकुगु खःसा म्येया काेरियाेग्राफि रूबि लामा मयजुं यानादीगु खः।
थ्व म्येया म्युजिक भिडियो या सिटी माएक्स सिनेमा हलय् मंगलबार पितब्वज्या जूगु खः ।
नेपालभाषाया न्हापांम्ह म्युजिक भिडियो निर्देेशक व सिने पत्रकारिताख्यःया न्ह्यलुवा विजयरत्न असंबरे विशिष्ट पाहाँ कथं झायादीगु उगु ज्याझ्वलय् स्वस्ती श्री गुरूकुल आइ बि स्कुलया प्रबन्ध निर्देशक मीना महर्जन, कल्चर डिपार्टमेन्ट अफ थाइ नेपाल एसाेसियशनपाखें राज कर्माचार्य, संकिपा निर्देेशक रवि सायमि, सन्चारकःमि दर्शनवीर शाक्य विशेष पाहाँ कथं झायादीगु खः ।
ज्याझ्वलय् थःगु नुगःखँ तयेगु झ्वलय् विशिष्ट पाहाँ असंबरे भाजुं पितब्वज्या जूगु म्येयात कुला दिसे आः थःगु भिडियो थःगु हे युट्युब च्यानलपाखें न्ह्यने हयेt पलाः न्ह्याकेमाः धका धयादिल ।
ज्याझ्वलय् कोरियोग्राफर कल्चरल एक्सेप्लोर नेपालया मूछ्यान्जे रुबी लामां लसकुस व ग्वसाः खलः पाखें नाइ नेपाली एशोसियसनया सेन्ट्रल कल्चरल डिपार्टमेण्टया राज कर्माचार्यं सुभाय् न्वचु तयादीगु खःसा थ्व म्येया कलाकार , प्राविधिक व ग्वाहालिमिपिन्त ग्वसाखलःया पाखें मूपाहाँ असंबरे भाजुं मतिनाया चिं व मीना महर्जनं सुभाय् पौ देछानादीगु खः ।
