प्रधानमन्त्री पुष्पकमल दाहाल ‘प्रचण्डं’ वर्तमान सरकारं बांलाःगु यायेगु व बांलाःगु बाहेक याये मयायेगु कनादीगु दु । दिवङ्गत वामपन्थी नेता निर्मल लामाया २३ क्वःगु स्मृति दिवसया लसताय् थाैं येँय् ग्वसाःग्वःगु ज्याझ्वलय् नुगःखँ तयादिसें वय्कलं थुगु खँ कनादीगु खः ।
प्रधानमन्त्री प्रचण्डं सामाजिक रूपान्तरणया निंतिं सामाजिक न्याय, सुशासन व समृद्धिया यात्रायात न्हूगु ढङ्गं न्ह्याकेगु अठोटयालिसें न्ह्यज्यानागु धयादिल ।
निर्मल लामालिसेया लुमन्ति न्ह्यथसें वय्कःयात स्वयाः हे थःपिं आन्दोलनय् न्ह्यज्यानागु व लामालिसे थःपिनि ताःहाकःगु लुमन्ति दुगु खँ प्रधानमन्त्री प्रचण्डं न्ह्यथनादिल ।
प्रधानमन्त्रीं सामाजिक न्याय, सुशासन व समृद्धिया निंतिं इमान्दार क्रान्तिकारी, बुद्धिजीवी, नागरिक समाजलिसें आम श्रमिक जनसमुदायया साथ व सहयोग दइगु भलसा प्वंकादिल ।
उगु हे ज्याझ्वलय् नुगःखँ तयादिसें उपप्रधान लिसें गृहमन्त्री नारायणकाजी श्रेष्ठं भ्रष्टाचारय् दुथ्याःपिन्त मत्वःतेगु धाःगु दु । वय्कलं देसय् यक्व समस्या दुगु व कमिसन व भ्रष्टाचारं देय् भ्वाभः दय्कूगु न्ह्यथनादिल ।
कमिसनखोर व भ्रष्टाचारीयात कारबाही यायेत थः लिमचिलेगु वय्कःया दाबी दु । वय्कलं खाडीइ ज्या यायेत वंपिं ३० लाख नेपाःमिपिन्त स्वदेशय् हे लजगाः सिर्जना यायेत भ्रष्टाचारीयात कारबाही यायेगुया विकल्प मदु धयादिल । वय्कलं निर्दोष मनू ग्यायेमाःगु आवश्यक्ता मदुगु नं न्ह्यथनादिल ।
(तस्वीर ः सरिता महर्जन)