नेकपा एमालें पार्टी सचिव टोपबहादुर रायमाझीयात पार्टीं निलम्बन याःगु दु ।
‘नक्कली भुटानी शरणार्थी प्रकरणय् जिमिगु पार्टीया केन्द्रीय सचिव टोपबहादुर रायमाझीयात अनुसन्धानया निंतिं पक्राउ पूर्जी जारी याःगु विषयस जिमिगु पार्टीया गम्भीर ध्यानाकर्षण जूगु दु। जिमिसं विधिया शासनय् विश्वास याना। राज्यया वैधानिक संस्थातय्सं याइगु अनुसन्धानया ज्याय् सकसिनं ग्वाहालि यायेमाः व सुयागुं बारे छुं विवाद ब्वलंसा उकिया बारे कानुनी सफाइ प्राप्त यायेगु दायित्व सम्बन्धित व्यक्तिया हे खः धइगु जिमिगु पार्टीया स्थापित मान्यता दयावयाच्वंगु दु’, महासचिव पोखरेलं धयादीगु दु, ‘उगु हे मान्यताकथं पक्राउ पुर्जी जारी जुइवं वय्कःयात राज्यया अनुसन्धान निकायस उपस्थित जुयाः विधिवत् रूपय् थःगु यथार्थ स्पष्ट यायेत धयागु खः । वय्कलं नेतृत्वयात थुगु विषयस सहमति नं प्वंकादीगु खः । तर पार्टी नेतृत्वयात बिउगु भलसा अःखः वय्कः सम्बन्धित निकायस उपस्थित मजूगु विषययात म्हिगः च्वंगु केन्द्रीय सचिवालयया मुँज्यां गम्भीरतापूर्वक कासें वय्कःयात अविलम्ब सम्बन्धित निकायस उपस्थित जुयाः अनुसन्धानय् ग्वाहािल यायेत निर्देशन याःगु खः ।’
पोखरेलं केन्द्रीय सचिवालयया उगु निर्णयात तकं ध्यानय् तसें राज्यं याइगु अनुसन्धानय् ग्वाहािल जुइमा धकाः पार्टीं रायमाझीयात अनुसन्धान व कानुनी कारबाहीया प्रक्रिया क्वमचाःतले पदपाखें निलम्बन याःगु खः ।
नक्कली शरणार्थी प्रकरणय् मुछे जूम्ह टोपबहादुर वंगु वैशाख २० गतेनिसें बिसिउँ वनाच्वंगु दु । अर्घाखाँचीं येँय् वःम्ह वय्कः बेपत्ता हे तिनि ।
वय्कः विरुद्ध प्रहरीं पक्राउ पुर्जी जारी याये धुंकूगु दु । वय्कःया काय् सन्दीप रायमाझी वैशाख २० गते सनिलय् हे बुटवलं ज्वने धुंकूगु दु ।
थ्व प्रकरणय् प्रहरीं पूर्वगृहमन्त्री तकं जुइ धुंकूम्ह नेपाली कांग्रेसया नेता बालकृष्ण खाँणयात थाैं हे सुथय् ज्वंगु खः ।
