प्रधानमन्त्री पुष्पकमल दाहाल प्रचण्डं नेपाली कांग्रेसया सांसद सुरेन्द्र आचार्ययात मन्त्री नियुक्त याःगु दु । प्रधानमन्त्री प्रचण्डं आइतबाः आचार्ययात मन्त्री नियुक्त याःगु खः ।
मन्त्रीइ नियुक्त आचार्यं राष्ट्रपतिया कार्यालय शीतल निवासय् थाैं हे शपथ ग्रहण याःगु दु । वय्कःयात राष्ट्रपति रामचन्द्र पौडेलं पद तथा गोपनीयताया शपथ नकूगु खः ।
सपथ ग्रहणय् प्रधानमन्त्री पुष्पकमल दाहाल प्रचण्ड, सभामुख देवराज घिमिरे व राष्ट्रियसभाया नायः अध्यक्ष गणेशप्रसाद तिमल्सिनालिसें उच्च पदस्थ सरकारी अधिकारीपिनि ब्वति दुगु खः ।
कपिलवस्तु क्षेत्र नं. २ पाखें प्रतिनिधिसभाय् निर्वाचित वय्कः नेपाली कांग्रेसय् डा. शेखर कोइराला पक्षया सांसदकथं म्हस्यू।
आचार्ययात प्रधानमन्त्री प्रचण्डं महिला बालबालिका तथा ज्येष्ठ नागरिक मन्त्रालयया जिम्मा बीगु जूगु दुसा वंगु चैत १७ गते नेपाल समाजवादी पार्टीया महिन्द्र राय यादवं महिला, बालबालिका तथा ज्येष्ठ नागरिक मन्त्रालय कःघाना वयाच्वंगु खः । वय्कःया मन्त्रालय लच्छि मदुनिबलय् हे हिलाबुला जूगु दु ।
यादवयात महिला मन्त्रालयं सरुवा यानाः खानेपानी मन्त्रालय जिम्मेवारी बिइगु जूगु दु । यादव डा. बाबुराम भट्टराई नेतृत्वया नेपाल समाजवादी पार्टीया अध्यक्ष नं जुयादी ।