प्रधानमन्त्री पुष्पकमल दाहाल ‘प्रचण्डं’ नेपाली भूमिइ बुद्धया जन्म नेपाः व नेपाःमिया निंतिं गर्वया विषय जूगु खँ कनादीगु दु । २५६७ क्वःगु बुद्ध जयन्ती लिसें लुम्बिनी दिवस २०८० या लसताय् ग्वसाःग्वःगु ज्याझ्वलय् नुगःखँ तयादिसें प्रधानमन्त्री प्रचण्डं उगु खँ कनादीगु खः ।
वय्कलं धयादी, ‘‘ईशापूर्व ६२३ य् शाक्यमुनि बुद्धको जन्म लुम्बिनीया क्यबय् जुल । नेपाली भूमिइ बुद्धया जन्म नेपाल व नेपालीया निंतिं गर्वया विषय खः। वय्कःया जन्मं नेपाःयात विश्वय् म्हसीकूगु जक मखसें धार्मिक पर्यटनया माध्यमं असीमित सम्भावनातकं उपलब्ध याकूगु दु ।’’
प्रधानमन्त्रीं हलिंन्यंकया प्यंगू अर्बस्वयां अप्वः बौद्ध समुदायं जीवनय् छक्वः वये हे माःगु पवित्रस्थलकथं लुम्बिनीया सम्भाव्यता गुलि जुइ अन्दाज याये थाकु धयादिल ।
सभा स्वयां न्ह्यः २५६७ क्वःगु बुद्धजयन्तीया लसताय् बुद्ध बूगु थाय् लुम्बिनी झःझः धायेक छायेपियातःगु दु । बुद्ध जयन्तीया लसताय् थाैं लुम्बिनीइ बृहत् शान्ति र्याली पिकाःगु दु ।
लुम्बिनी विकास कोषं बुद्ध जयन्ती लिसें लुम्बिनी दिवस २०८० या निंतिं प्रधानमन्त्री पुष्पकमल दाहाल ‘प्रचण्ड’लिसें विशिष्ट व्यक्तिपिन्त लुम्बिनीइ सःताः ज्याझ्वःया ग्वसाःग्वःगु दु ।
औपचारिक ज्याझ्वः न्ह्यः धार्मिक पूजालिसें ५ नं गेटनिसें मायादेवी देगः जुयाः थीथी झाँकीलिसें सम्मेलन केन्द्रतक शान्ति र्याली पिकाःगु खः ।
विशेष समारोहय्र लुम्बिनी विकास कोषया नायःलिसें संस्कृति पर्यटन तथा नागरिक उड्डयनमन्त्री सुदन किराँती, लुम्बिनी प्रदेशया मुख्यमन्त्री डिल्लीबहादुर चौधरी, प्रतिनिधि सभा, प्रदेश सभा सदस्य, स्थानीय सरकार प्रमुख, कुटनीतिक नियोग, विदेशी पाहाँपिं लिसेंया ब्वति दु ।